Sedert die projek in Junie verlede jaar begin het, is 70% vordering getoon – finansieel en fisies. Die geskatte voltooiing was vir Desember verlede jaar beplan, maar weens die uitputting van toegekende fondse is werk vertraag.

Tydens die provinsiale staatsrede by Lemo Green Park in Bloemfontein vroeër vanjaar, het premier MaQueen Letsoha-Mathae gesê R1,9 miljard word in padkonstruksie, opgradering en onderhoud belê.

’n Bykomende R993 miljoen is beskikbaar gestel vir spesiale padonderhoud om vinnige padverval as gevolg van verhoogde vragvervoer aan te spreek.

“Ons waardeer die geduld en ondersteuning van die gemeenskap terwyl ons voortgaan met die spesiale onderhoud tussen Rosendal en Senekal,” het Hillary Mophethe, die Vrystaatse departement van gemeenskapsveiligheid, paaie en vervoer se woordvoerder, gesê.

“Ons wil padgebruikers verseker dat die projek voortgaan en die werk hervat sal word met die nuwe finansiële jaar se begroting. Hierdie projek gaan nie net oor paaie nie, dit gaan oor beter vervoer, veiliger reis, werkskepping en ekonomiese groei vir plaaslike besighede.”

’n Bykomende R250 miljoen is vir nuwe padprojekte in die 2025/26 finansiële jaar beskikbaar gestel:

• Clocolan na Marquard  
• Ladybrand na Hobhouse  
• Dealesville, Hertzogville, en Christiana-grens  
• Oppermansgronde (opgradering van gruis na oppervlak)  
• Thaba Nchu S1523  
• Thaba Nchu S1531  
• Reitz na Kestell

Motoriste wat tussen die twee dorpe reis, word aangeraai om die S1227 en S665 as ompad te gebruik; ’n spoedbeperkings van 60 km/h moet gehandhaaf word op die 30 km gruisompad.

“Die impak van die padwerke is nie so erg as wat die toestand van die pad voorheen was nie,” het Riëtte Dell, Setsoto-raadslid en ’n plaasbewoner van die omgewing, gesê. “Ons gee nie om oor die ongerief nie, want daardie pad was onbegaanbaar, onveilig, en dit was al vir ’n geruime tyd.”

“Die landbougemeenskap hoop op ’n kwaliteit-geboude pad met toepaslike stormwaterdreinering wat jaarliks onderhou sal word, sodat ons weer ’n lewenslyn vir ons ekonomiese aktiwiteite kan hê, sodat landbou en toerisme weer in die Oos-Vrystaat kan blom.”

OFM Nuus/Zenande Mpame cg