Thato Morake (34) en Ayanda Ndwanya (35), beide werknermers by die Phokwane munisipaliteit, is op 27 Maart deur die Valke se Kimberley Ernstige Kommersiële Misdaad-ondersoekspan in Hartswater in hegtenis geneem, sê lt.kol. Tebogo Thebe, die Valke se woordvoerder in die Noord-Kaap.

Die beskuldigdes is sedertdien op borgtog van R50 000 elk vrygelaat.

“Die beskuldigdes het na bewering munisipale betalings as direkte deposito’s in die interne finansiële grootboeke aangeteken terwyl hierdie betalings nie in die bankstate gereflekteer is nie.”

Borgtog van R50 000 toegestaan

Volgens Thebe het dit gelyk asof die kontantbetalings vir persoonlike gebruik in die sak gesteek is terwyl dit as direkte deposito’s vasgelê is.

Hy sê die Phokwane Munisipaliteit het die inhegtenisneming van die twee amptenare op aanklagte van bedrog, alternatiewelik diefstal, en geldwassery verwelkom.

Kgalalelo Letshabo, munisipale woordvoerder, sê die inhegtenisneming volg op ’n intensiewe ondersoek wat die munisipaliteit in 2023 gedoen het. “Die finansiële teenstrydighede wat ontdek is, is aan die owerhede gerapporteer vir verdere ondersoek. Die munisipaliteit sal aanhou voldoen en verseker dat daar deursigtigheid van die hele proses is.”

Ruan Maritz is op borgtog vrygelaat. Foto verskaf

Intussen sal nog ‘n Noord-Kaapse man op 12 Mei in die hof op Hartswater verskyn nadat hy beleggers na bewering uit miljoene bedrieg het.

Die Valke se ondersoekeenheid vir ernstige handelsmisdade het Ruan Maritz (30) van Hartswater Dinsdag (25/3) op aanklagte van bedrog en geldwassery in hegtenis geneem, sê kol. Tebogo Thebe, provinsiale Valke-woordvoerder.

Maritz het hom na bewering aan die klaers en ander vermeende slagoffers voorgedoen as ’n makelaar vir Quick Trade Investment and Forex Trading. Luidens die beleggingskontrak sou hy, as beleggers 50% belê, dieselfde persentasie bydra, vertel Thebe, maar na bewering het hy dié belofte nie gestand gedoen nie, sê Thebe.

OFM Nuus cg