Central SA
Noord-Kaapse skole kan weer atletiek hou─── CHARNÉ VAN DER MERWE 14:30 Mon, 10 Feb 2025
Die datum van die Noord-Kaapse Skoleatletiekbyeenkomste sal binnekort hersien word ná dringende samesprekings tussen die provinsiale onderwysdepartement en Noord-Kaap Skoleatletiek, nadat dit verlede week opgeskort is.
Skokgolwe is Donderdag (6/2) deur die provinsie gestuur toe Noord-Kaap Skoleatletiek die opskorting van skoleatletiek, insluitend baan- en velditems, vir 2025 aangekondig het weens ’n onderwysstaking.
VF Plus-LP dr. Wynand Boshoff, sy party se hoofwoordvoerder oor onderwys, het die besluit onmiddellik gekritiseer en gesê dat dit die behoefte beklemtoon om openbare onderwys uit die beheer van die ANC-regering en geaffilieerde vakbonde te verwyder.
Foto: iStock
Die onderwysersvakbond Sadou wou die Noord-Kaapse onderwysdepartement blykbaar straf vir die nie-nakoming van sy finansiële verpligtinge, wat onder meer insluit dat sowat 800 onderwysers nog nie hul salaris vir Januarie ontvang het nie en toelaes ook nie aan skole betaal is nie.
Boshoff meen die vakbonde straf die departement doelbewus vir sy finansiële tekortkominge deur ’n Work to Rule-oefening te implementeer, wat skolesport, insluitend atletiek, in die gedrang geplaas het.
Geoffrey van der Merwe, onderwyswoordvoerder, het bevestig dat die departement met Noord-Kaap Skoleatletiek vergader het om die kwessie te bespreek. Ná deeglike beraadslaging het hulle besluit om voort te gaan met die atletiekbyeenkomste.
'n Nuwe datum vir die Noord-Kaap Skoleatletiek word hersien. Foto: iStock
“Die Noord-Kaapse departement van onderwys is ten volle verbind tot die welstand van ons leerders,” sê Van der Merwe. “Hierdie geleenthede bied ’n belangrike platform vir studente om op distriks-, provinsiale en nasionale vlak mee te ding.”
Hy het ook waardering uitgespreek vir die toewyding wat leerders, ouers, onderwysers en skole toon in die voorbereiding vir die atletiekkampioenskap. Die nuwe datum sal binnekort aangekondig word.
Verlore tyd
Hoewel die atletiekbyeenkomste voortgaan, sê Boshoff die verlore tyd kan nie maklik ingehaal word sonder aansienlike ontwrigting nie. “Die vakbonde lyk nie bekommerd oor die blywende uitwerking wat dit op leerders sal hê nie.
“Die kwessie van hierdie atletiekbyeenkomste is ’n skerp herinnering dat die staat en vakbonde nie meer vertrou kan word om onderwys veel langer te bestuur nie,” sê Boshoff.
