Benson Musaiwah (35), Alexander Kumaga (24) en Stevien Maldzan (22) staan tereg op verskeie ernstige aanklagte, insluitend twee van roof met verswarende omstandighede en drie van poging tot moord, sê Luxolo Tyali, provinsiale NVG-woordvoerder. Hulle gaan die aansoek Dinsdag (11/2) in die Makhanda-landdroshof teenstaan.

Kumaga het na bewering Sondag die eienaar (74) van die plaas waarop hy en Musaiwah werk, in die omgewing van Salem tussen Makhanda en Kenton-on-Sea, gebel oor ’n slang in die hoenderhok, sê Tyali. Maldzan is glo ’n kennis van die ander twee.

Hande met ’n tou vasgebind

Toe die vrou ondersoek instel, het Kumaga haar na bewering aangeval en haar hande met ’n tou vasgebind. Maldzan en Musaiwah het toe na bewering die vrou se man (76) en hul dogter (57) aangeval en geld geëis. Die verdagtes het na bewering onder meer skootrekenaars, ’n selfoon, ’n naaimasjien, ’n radio, klere en R2 800 kontant gesteel, sê Tyali. 

Kumaga en Maldzan is op die toneel in hegtenis geneem, terwyl Musaiwah die volgende dag aangekeer is nadat die bejaarde slagoffer hulle uitgeken het.

Agri Oos-Kaap veroordeel die misdaad intussen ten sterkste. Die organisasie loof die flinke optrede van die polisie, private sekuriteit, landelike veiligheidstrukture en naburige boere wat bygedra het tot die vinnige inhegtenisneming van die oortreders.

Agri Oos-Kaap veroordeel die aanval

“Ons stem heeltemal saam en verwelkom die standpunt wat die NVG ingeneem het om borgtog teen te staan,” sê Brent McNamara, uitvoerende hoof. “Hierdie aanvalle op landelike gemeenskappe word veroordeel, en ons vertrou dat, ná ’n skuldigbevinding, die hof ’n vonnis sal oplê wat sulke aanvallers in die toekoms sal afskrik.”

McNamara maak melding van die ontstellende aard van die voorval en dat werknemers teen hul werkgewers gedraai het. “Wat ontstellend is, is dat dit ’n geval is van werknemers wat diegene wat werk verskaf, aanskakel.”

Agri Oos-Kaap belowe om die saak noukeurig dop te hou om te verseker dat geregtigheid geskied.

OFM Nuus/Charne van der Merwe cg