Hy sal Maandag (13/1) in die Bethlehemse landdroshof op aanklagte van bedrog en vervalsing verskyn. Zweli Mohobeleli, Vrystaatse Valkewoordvoerder, sê die ondersoek het in Januarie verlede jaar begin nadat die Valke inligting ontvang het oor onreëlmatighede in die tender van R9,8 miljoen vir die opgradering van watervoorsiening in Clarens.

“Na bewering het die finansiële beampte van die Dihlabeng-munisipaliteit ’n betaling goedgekeur vir die diensverskaffer gegrond op die verslag wat deur die tegniese bestuurder verskaf is. Daar is later ontdek die handtekening van die siviele ingenieur in die verslag is glo deur die verdagte vervals,” sê Mohobeleli.

Hierdie inhegtenisneming volg op ’n reeks korrupsiesake wat senior amptenare by die munisipaliteit betrek. In Augustus 2023 is drie senior amptenare aangekeer omdat hulle die munisipaliteit met miljoene rand bedrieg het.

Thabang Johannes Thinyane (43), 'n diensverskaffer, Ntokozo Erick Shabalala (43), ’n direkteur, en Lekgetho Isaac Mokgathle (53), munisipale bestuurder, is in hegtenis geneem op aanklag van bedrog, het IOL berig. Dit het gevolg ná ’n wenk van die Vrystaatse premier se kantoor oor bewerings van bedrog wat met die munisipaliteit verbind word. Daar is beweer dat Mokgathle en Shabalala Thinyane onreëlmatig as ’n diensverskaffer aangestel het om dieselkragopwekkers by watersuiweringswerke by die Saulspoortdam te verskaf en te installeer sonder om behoorlike prosesse te volg.

Die projek sou glo R7,2 miljoen beloop, maar die diensverskaffer het slegs ’n blad op die terrein opgerig en die munisipaliteit R611 000 vir die onvoltooide werk gevra.

OFM Nuus/ Kekeletso Mosebetsi dg