“John-Ross Henderson (38) het Vrydag (4/10) in die Kimberley-landdroshof verskyn vir sy formele borgtogaansoek. Die hof het egter borgtog vir die beskuldigde geweier,” sê Sergio Kock, polisiewoordvoerder.

“Henderson staan tereg op aanklagte in verband met die dood van Jayson Afrique, ’n plaaslike sakeman wat op 31 Julie voor sy vrou, Micayla, doodgeskiet is terwyl hulle buite hul woonkompleks geparkeer was.”

Afrique (28) was ’n passievolle motorfietsentoesias en baie betrokke by sy motorfietsklub, die CC Riders. Klublede het ook ’n petisie by die hof ingedien.

CC Riders se klublede eis geregtigheid vir Jayson Afrique. Foto: Facebook

Mike Muller, ’n lid van die Kimberley CC Riders, het gesê hoe erg Afrique gemis word en opgemerk dat tyd sal moet verloop vir almal om weer normaal te funksioneer. “Ons voel sy afwesigheid baie, veral sy gewone sitplek in die klubhuis en sy teenwoordigheid in die groep tydens ritte.”

OFM Nuus het voorheen berig die voorval het omstreeks 21:00 plaasgevind toe ’n aanvaller hul voertuig genader het en verskeie skote deur die venster geskiet het. In ’n desperate poging om Micayla te beskerm, is Afrique getref en het hy uiteindelik op die toneel gesterf, terwyl Micayla later vir skok in die hospitaal opgeneem is.

Henderson is op 20 September deur die polisie by ’n vulstasie in Kimberley in hegtenis geneem op aanklagte van moord en poging tot moord ná ’n twee maande lange ondersoek oor die voorval in New Park vanjaar.

Henderson was die eienaar van ’n sekuriteitsfirma in die gebied en is die seun van die voormalige politikus Ross Henderson, wat voorheen ook as ’n polisiebeampte gedien het.

Tydens ’n vorige borgtogverhoor het die vervolging beklemtoon dat Henderson se selfoon op die misdaadtoneel gevind is, volgens Mojalefa Senokoatsane, NVG-woordvoerder.

Henderson se verdedigingspan het egter aangevoer dat die foon deur iemand anders op die toneel geplant is. Henderson sal in aanhouding bly. Die saak is tot 25 November uitgestel vir verdere ondersoek.

OFM Nuus/Heidrè Malgas cg