Inwoners van Tweeling en Frankfort in die Vrystaat is gefrustreerd weens beeste en perde wat vrylik deur woongebiede rondloop en amok veroorsaak.

Die meeste van die beeste is ongemerk, wat dit moeilik maak om hul eienaars te identifiseer, sê Suzette Steyn, DA-raadslid van Mafube-munisipaliteit.

“Inwoners kla dat die voortdurende geblaf van honde oorweldigend en aanhoudend is, aangesien beeste en perde dikwels sonder toesig deur dorpe rondloop. Klagtes aan die munisipaliteit én die polisie word geïgnoreer.”

Niemand mag perde en beeste aanhou sonder ’n permit nie. Foto verskaf

Volgens Steyn bevorder ’n verordening oor die aanhou van diere, pluimvee en bye die belange van inwoners, deur beheer uit te oefen oor die aantal en tipe diere of pluimvee wat aangehou mag word, asook die omstandighede waaronder sulke diere of pluimvee aangehou, gehuisves en versorg mag word.

“Dit sluit ook maatreëls in om (enige ongerief) wat deur hierdie diere of pluimvee veroorsaak word te voorkom. Om beeste en perde aan te hou, benodig ’n mens permitte. 

“Niemand mag hierdie diere aanhou sonder ’n permit wat deur die munisipale bestuurder uitgereik is nie,” voeg Steyn by. “Die munisipale bestuurder het die gesag om so ’n permit te kanselleer as hulle meen die aanhou van die diere skep ’n openbare oorlas.”

Volgens die verordening moet beeste en perde in ’n stal of omheinde area gehuisves word, met die eienaar verantwoordelik vir die instandhouding van die perseel en enige verwante toerusting.

Steyn verduidelik dat geen stal nader as 15 m geleë mag wees nie van enige grens van ’n ander erf, woning, gebou of struktuur wat vir menslike bewoning gebruik word. Dit moet minstens 50 m van enige put, waterloop of enige ander waterbron wees wat vir menslike gebruik bedoel is.

“Die doel van hierdie verordening is om toe te laat dat diere binne die raad se jurisdieke gebied aangehou mag word, terwyl riglyne nagekom word wat regverdig toegepas kan word. Swak bestuur en onbehoorlike sorg kan die woonbuurt nadelig beïnvloed deur geraas, reuke, skade aan eiendom, en gesondheids- en veiligheidskwessies.”

‘Enige individu wat die verordening oortree, begaan ’n misdryf’

Steyn wys daarop dat die munisipale bestuurder en enige gemagtigde munisipale beamptes by magte is om inspeksies uit te voer om nakoming van die verordening te verseker.

“Enige individu wat die verordening oortree of weier om aan ’n kennisgewing daarvolgens te voldoen, begaan ’n misdryf en kan beboet word met tot R2 000, tot ses maande tronkstraf, of albei,” sê Steyn.

Die DA doen ’n beroep op die waarnemende munisipale bestuurder, Mothusi Lepheana, om stiptelik inspeksies te doen om die openbare oorlas wat deur die rondloperbeeste en -perde veroorsaak word aan te spreek en orde in Mafube te herstel.

OFM Nuus/Charne van der Merwe cg