Meer as 78 000 Suid-Afrikaners het óf geregistreer, óf aansoek gedoen om vanuit die buiteland te stem.

Voorbereidings is aan die gang om hierdie burgers te akkommodeer. ’n Noemenswaardige konsentrasie potensiële kiesers is op verskeie plekke wêreldwyd saamgetrek, sê die OVK.

Die meeste van die kiesers is in Londen in Brittanje (24 535); gevolg deur Den Haag in Nederland (6 659); Canberra in Australië (3 674); Dubai in die Verenigde Arabiese Emirate (3 266); Dublin in Ierland (3 040); Wellington in Nieu-Seeland (2 292); New York (1 799) en Washington (1 799) in Amerika; en Berlyn in Duitsland (1 478).

‘Pogings is aan die gang om verkiesingsmateriaal wêreldwyd te versend’

Die OVK sê 55 629 kiesers het reeds geregistreer, terwyl ’n bykomende 22 400 met behulp van VEC 10-kennisgewings om registrasie aansoek gedoen het.

“Pogings is aan die gang tussen die Departement van Internasionale Betrekkinge en Samewerking (Dirco) en die OVK om verkiesingsmateriaal na 111 Suid-Afrikaanse missies wêreldwyd te versend” en stemlokale, stembusse, stembriewe, skryfbehoeftes en kieserslyste gereed te kry.

Stemdag in die buiteland is op sommige plekke geskeduleer vir 17 Mei, insluitend Algerië (Algiers), Jordanië (Amman), Egipte (Kaïro), Sirië (Damaskus), Saoedi-Arabië (Jeddah en Riyadh), Koeweit, die Wesoewer (Ramallah) en Iran (Teheran).

‘Ure vir stemlokale wissel’

Vanweë die aansienlike getal kiesers teenwoordig, sal mense in Londen op 17 én 18 Mei kan stem, terwyl ander lande slegs op 18 Mei verkiesing sal hou. Besigheidsure vir stemlokale wissel, met Londen, New York en Washington oop vanaf 07:00 tot 21:00, en ander plekke van 07:00 tot 19:00.

Kiesers moet ’n geldige identiteitsdokument voorlê om aan die verkiesingsproses deel te neem. Sodra dit voltooi is, sal stembriewe na die OVK-hoofkwartier vervoer word, onder toesig van verteenwoordigers van politieke partye en onafhanklike kandidate, om getel te word.

Dirco het veral die sluiting van missies in Soedan, Tel Aviv (Israel) en Kiëf (Oekraïne) bevestig weens veiligheidskwessies, wat dit onmoontlik maak in hierdie plekke.

‘Spesiale stemme in albei kategorieë word vir 27 en 28 Mei beplan’

Boonop het die OVK ’n verlenging van die sperdatum vir spesiale stemaansoeke aangekondig, wat tot dusver meer as 1,4 miljoen aansoeke ontvang het.

Hierdie uitbreiding is van toepassing op twee kategorieë: huisbesoeke vir geregistreerde kiesers wat weens siekte of mobiliteitskwessies nie kan reis nie, en vroeë stemming by stemlokale vir diegene wat dit verkies. Spesiale stemme in albei kategorieë word vir 27 en 28 Mei beplan, gevolg deur die algemene stemdag op 29 Mei.

OFM Nuus/Charne van der Merwe mvh