Die tema vir vanjaar se 16 Dae van Aktivisme is "Versnelling van aksies om geslagsgeweld en vrouemoord te beëindig en om niemand agter te laat nie". Daar is met die veldtog 25 jaar gelede in Suid-Afrika begin.

Die polisie in die Noord-Kaap het die naweek met die veldtog by die Kakamas-taxistaanplek begin en baie gemeenskapslede bereik.

“Inligting en pamflette oor geslagsgeweld en vrouemoord, gesinsgeweld en middelmisbruik is uitgedeel en polisiedienste is by die taxistaanplek deur mobiele gemeenskapsdienssentrums gelewer,” sê Omphile Masegela, polisiewoordvoerder.

Die polisie het dienste by die Kakamas-taxistaanplek gelewer. Foto: SAPD

Adj.pres. Paul Mashatile het Saterdag (25/11) die 16 Dae van Aktivisme-veldtog in Mpumalanga van stapel gestuur. “As ’n regering en as ’n nasie bly ons daartoe verbind om die pandemie van GBVF te beëindig. Ons sal nie rus totdat ons gemeenskappe veilig is vir almal nie, veral vroue en meisies,” het hy gesê.

Die Noord-Kaapse provinsiale regering het Maandag (27/11) sy veldtog met 'n verhoogstuk van 90 minute begin wat die verhaal van GBV, die invloed van MIV/vigs in samelewings en die ingryping van die regering deur middel van onderwys en vermaak uitbeeld. Die produksie sal in al die distrikte van die provinsie opgevoer word.

Die Noord-Kaapse Provinsiale Regering het die toneelstuk 'Sekunjalo' bekendgestel. Foto: Facebook/Noord-Kaapse Provinsiale Regering

Prof. Francis Petersen, UV-visekanselier, sê dit is noodsaaklik dat bewustheid in werklike aksie ontwikkel en daar is baie wat universiteite kan doen om 'n werklike verskil te maak.

OFM News/Zenande Mpame Daphné