Central SA
Brand buite Kimberley aangemeld─── 15:37 Thu, 13 Oct 2022
Die Sol Plaatje-munisipaliteit het brandweerdienste na die N12 buite Kimberley ontplooi waar 'n veldbrand naby Kampfersdam uitgebreek het.
Die woordvoerder van die Departement van Landbou in die provinsie, Zandisile Luphahla, sê hulle bied ondersteuning aan brandbestryders wat in die provinsie aangekom het om te help met veldbrande.
Die provinsie is reeds die afgelope twee weke deur veldbrande getref, wat volgens Agri Noord-Kaap se president, Nichol Jansen, reeds nagenoeg 200 000 hektaar weiveld vernietig het.
In die Kai Garib munisipale regsgebied het 'n brand gister by die ingang van Keimoes - wat vermoedelik deur 'n onbekende persoon gestig is - skade aan wingerde en palmbome aangerig. Brandspanne het gesukkel om die brand, wat deur sterk wind aangeblaas is, onder beheer te bring.
Die Kai Garib burgemeester, Marshall Matthuys, het intussen bevestig dat hul brandweer vroeër tussen Kenhardt en Keimoes ontplooi is, waar brandspanne tans met die hulp van boere en plaaswerkers probeer om die brand te blus.
