Central SA
Publiek oor veldbrande gewaarsku─── HEIDRÈ MALGAS 07:11 Sun, 07 Aug 2022
Die Vrystaatse Sambreelbrandbeskermingsvereniging (FSUFPA) waarsku groot gedeeltes van die provinsie teen gevaarlike tot uiters gevaarlike veldbrandtoestande Sondag van 08:00-20:00.
Dit waarsku dat veldbrande onder hierdie toestande maklik kan opvlam, vinnig versprei, en hoë intensiteit brande kan word.
Johan Breytenbach van die FSUFPA sê die primêre verantwoordelikheid lê by grondgebruikers.
“Hulle moet toesien dat hulle toerusting om brande te bestry diensbaar is en dat hulle gereed kan staan in hierdie omstandighede, want as ’n brand ontstaan kan dit baie vinnig versprei,” het Breytenbach gesê.
Hy het bygevoeg dat die algemene publiek bewus moet wees, brande vinnig moet rapporteer, en die heel belangrikste is dat almal ’n verhoogde bewustheid moet hê van hul persoonlike optrede.
“Moet nie oop vure maak nie, moet nie brandende materiaal los nie, moenie goed doen wat ’n brand kan veroorsaak nie, want as ’n brand veroorsaak word, is daar ’n baie goeie kans dat dit ’n wegholveldbrand kan word,” het hy bygevoeg.
