President Cyril Ramaphosa het Vrydag die Wysigingswet op Elektrisiteitsregulering as wet onderteken. Die ondertekening was ’n belangrike stap in die rigting van die ontbondeling van Eskom en die transformasie van Suid-Afrika se elektrisiteitsektor.

Die nuwe, uitgevaardigde wet maak voorsiening vir die skepping van ’n transmissiestelseloperateur en ’n opemarkplatform, wat die regering hoop mededingende elektrisiteitsverhandeling moontlik sal maak.

Die plan het vir die eerste keer in Ramaphosa se 2019 staatsrede ter sprake gekom.

‘Dit maak paaie oop vir groter mededinging en verlaagde energiekoste’

Vincent Magwenya, woordvoerder van die presidensie, meen die wet stel verreikende hervormings in wat daarop gemik is om ’n mededingende elektrisiteitsmark te vestig. “Die wetsontwerp, wat deur die president onderteken is, wysig die Elektrisiteitsreguleringswet van 2006 om huidige uitdagings in die elektrisiteitsektor aan te spreek.

“Dit maak paaie oop vir groter mededinging en verlaagde energiekoste, verhoog investering in nuwe opwekkingskapasiteit om energiesekerheid te bereik, en stig ’n onafhanklike transmissiemaatskappy om toesig te hou oor die nasionale netwerk.

“Die wet lê ook streng strawwe op vir skade aan en sabotasie van infrastruktuur,” het Magwenya verduidelik.

TO ALL MEDIA/NEWS EDITORS

FRIDAY 16 AUGUST 2024

PRESIDENT RAMAPHOSA ASSENTS TO ELECTRICITY REGULATION AMENDMENT BILL

President Cyril Ramaphosa has signed into law the Electricity Regulation Amendment Act which sets out far-reaching reforms of South Africa’s electricity sector,…

— Chris Yelland (@chrisyelland) August 16, 2024

“Die Wysigingswet op Elektrisiteitsregulering gee ’n mandaat om die Transmissiestelseloperateur SOC Bpk binne vyf jaar as ’n onafhanklike entiteit te vestig. Intussen sal die Nasionale Transmissiemaatskappy van Suid-Afrika as die TSO funksioneer.

“Die wet fasiliteer ook die skepping van ’n opemarkplatform vir mededingende groot- en kleinhandel-elektrisiteitsverhandeling,” het hy bygevoeg.

Magwenya het gesê die wet verduidelik ook beginsels vir die vasstelling of goedkeuring van pryse, heffings en tariewe.

Ramaphosa signs Electricity Regulation Amendment Act into lawhttps://t.co/O0KRaXnwJ9#electricity #legislation #ERA #SouthAfrica@PresidencyZA @TerenceCreamer

— Engineering News (@EngNewsZA) August 16, 2024

“Dit bepaal dat Nersa lisensiehouers in staat moet stel om die volle koste van hul aktiwiteite te verhaal, voorsiening te maak vir ’n redelike opbrengs in verhouding tot die gepaardgaande risiko’s, en kan aansporings bied vir voortgesette verbetering in tegniese en ekonomiese doeltreffendheid.”

“Om billike mededinging tussen veelvuldige elektrisiteitsopwekkers te verseker, vereis die wet dat die stelseloperateur nie tussen verskillende kragopwekkers of kliënte moet diskrimineer in stelselversending of balansering nie, behalwe vir objektiewe, regverdigbare redes wat deur die reguleerder goedgekeur is.

“Toegang tot die transmissie- en verspreidingskragstelsel moet objektief, deursigtig en nie-diskriminerend wees,” het Magwenya bygevoeg.

OFM Nuus cg