Een van die belangrike vergaderings is die Landbouwerkgroep Ministeriële Vergadering, wat landbouministers van alle G20-lidlande sal byeenroep, insluitend verteenwoordigers van die Afrika- en Europese Unie. Die Premierskantoor meen hierdie vergadering sal as ’n platform dien om dringende landbou-uitdagings en geleenthede die hoof te beid, en die Vrystaat se reputasie as ’n hoeksteen van landbou in Suid-Afrika, Afrika en wêreldwyd verder verstewig.

Die kantoor het in ’n verklaring laat weet die Vrystaat Provinsie sal verder ook gasheer speel vir twee kritieke vergaderings van die G20-taakspan oor voedselsekerheid onder Suid-Afrika se G20-presidentskap:

• Die 2de Taakspanvergadering: 18 April 2025
• Die 3de Taakspanvergadering: 14 - 15 September 2025

“Om hierdie geleentheid te maksimaliseer, sal verskeie bilaterale vergaderings met G20-lidlande gereël word om die provinsie se landboubeleggingsgeleenthede uit te lig,” sê Matshediso Setai, provinsiale regeringswoordvoerder.  

“Die Vrystaat sien daarna uit om wêreldleiers en belanghebbendes by hierdie kritieke besprekings te verwelkom en om sy deurslaggewende rol in die bevordering van voedselsekerheid en landbou-innovasie te toon.” 

Die tema vir Suid-Afrika se G20-presidentskap is “Solidariteit, Gelykheid, Volhoubaarheid”.

Wat is die G20 en hoe werk dit?

Die G20 is ’n internasionale forum wat vanjaar onder Suid-Afrika se presidentskap gelei word. Dié groep bestaan uit 19 lande en die Europese Unie, en dit verteenwoordig sowat 85% van die wêreldekonomie. Die G20 speel ’n sleutelrol in globale ekonomiese samewerking, en sy werk word oor ’n eenjaartermyn bestuur deur die land wat die presidentskap beklee.

Twee gespreksbane: Finansieel en Sherpa

Die G20 werk hoofsaaklik deur twee parallelle gespreksbane:

Die finansiële baan: Gelei deur ministers van finansies en goewerneurs van sentrale banke van die lidlande. Hierdie baan fokus op kwessies soos makro-ekonomiese beleid, finansiële regulering en internasionale belasting.

Die “sherpa”-baan: Gelei deur “sherpas”, wat persoonlike verteenwoordigers van die leiers van lidlande is. Hulle koördineer die breër beleidsprioriteite van die G20 en werk saam met die finansiële baan.

Elke gespreksbaan bevat tematiese werkgroepe waar verteenwoordigers van regeringsdepartemente, genooide lande en internasionale organisasies deelneem. Hierdie groepe vergader gereeld gedurende die presidentskaptermyn.

Rol van die ‘sherpas’

“Sherpas” speel ’n sentrale rol in die voorbereiding vir die G20-beraad. Hulle lei die onderhandelinge oor die agenda-items, koördineer beleidswerk, en verseker dat die beraad se uitkomste ooreenstem met die groep se doelwitte.

Betrokkenheidsgroepe

Benewens die regeringswerk sluit die G20 ook betrokkenheidsgroepe in. Hierdie groepe bring burgerlike samelewings, parlementariërs, dinkskrums, vroue-, jeug-, en arbeidsorganisasies, asook besighede en navorsers bymekaar. Hulle lewer belangrike insette oor verskeie globale uitdagings.

Geen permanente sekretariaat

Die G20 het geen vaste hoofkantoor nie. Die werk word ondersteun deur die troika, wat bestaan uit die vorige, huidige en toekomstige voorsitterslande. Gedurende Suid-Afrika se presidentskap sluit die troika ook Brasilië en die Verenigde State van Amerika in.

Met hierdie roterende stelsel speel elke presidensie ’n kritieke rol in die vorming van globale beleidsbesluite wat ekonomiese stabiliteit en samewerking oor die wêreld heen rig.

OFM Agri cg