Die moord op ’n bejaarde boer van Kuruman het organisasies in opstand gebring wat teen plaasmoorde en veediefstal veg. 

“Ons het aan die parlement se voortsettingskomitee oor polisie, asook die voortsettingskomitee oor landbou en die president van Suid-Afrika geskryf oor die veiligheid van ons boere en plaaswerkers en veediefstal,” sê Petrus Sitho, aktivis teen plaasmoorde en veediefstal.

Die antwoord van die parlement lui: “Die indiening is verwys na die minister van polisie vir sy ingryping, asook die voortsettingskomitee oor polisie.” Die brief met die versoek om beskerming van plaasgemeenskappe is ook aan die minister van landbou gestuur.

Sitho sê hulle wil nie beskerming hê nadat iets gebeur het nie. “Hoewel die oortreders aangekeer is, kan ons nie wag totdat boere vermoor word voordat daar opgetree word nie. Ons het nou aksie nodig, ons benodig beskerming en ingryping,” sê Sitho.

Die regering het iemand nodig om hulle wakker te skud en hy benodig hulle om op te tree. Die DA beplan om aan die voorsitter van die parlementêre portefeuljekomitee oor polisie te skryf om ’n dringende hersiening van die polisie se reservisbeleid aan te vra en die vinnige stigting van voldoende landelike veiligheidseenhede landwyd waar daar ’n tekort is, te versoek.

“Hierdie versoek volg op die moord op Hendrik Venter, ’n 81-jarige boer van Kuruman, wat Vrydag met drie kopwonde gevind is. Hy is in ’n lokval gelei en vermoor terwyl hy op pad was om lone aan sy werkers te betaal,” sê Willie Aucamp, hoof van die Kalahari-kiesafdeling.

“Die polisie het saamgewerk met plaasveiligheidsgroepe, die Kuruman-buurtwag en ’n nabygeleë myn in hul pogings om die verdagtes vas te trek. Hierdie pogings beklemtoon die dringende behoefte aan funksionele landelike veiligheidseenhede met toegewyde speurondersteuning binne die polisie om nie net op landelike misdade te reageer nie, maar ook om dit te help voorkom,” sê Aucamp.

In die 2011/12-tydperk was daar 52 054 polisiereserviste landwyd, maar hierdie getal het tot 4 393 teen 2021/22 gedaal en tot 3 502 in November 2023. Hierdie beduidende afname, insluitend ’n 63%-daling in een jaar, het ’n gevaarlike gaping in landelike polisiëring geskep wat dringend aangepak moet word.

Die DA sal voortgaan om sulke ondersoeke noukeurig dop te hou. 

OFM Nuus/Heidrè Malgas dg/mvh