Die vier dae lange NAMPO Kaap, wat deur Graan SA in samewerking met Bredasdorp Park NPC van 11 tot 14 September 2024 aangebied is, het 45 894 besoekers gelok.

Innovasies van regoor die landbousektor is ten toon gestel by die ekspo wat sy vyfde bestaansjaar gevier het onder die tema “Landbou: Die Ruggraat van Ekonomiese Groei”.

“Die ekspo het sy posisie verstewig as ’n noodsaaklike platform vir bedryfslui, rolspelers in die industrie, produsente en die breër gemeenskap om die nuutste tegnologie te verken, huidige uitdagings te bespreek en die toekoms van landbou te vier,” lui  ’n verklaring van Graan SA.

Henk Aggenbach, voorsitter van Bredasdorp Park NPC, het die ekonomiese hupstoot uitgelig wat die ekspo vir die streek bring, wat ’n geskatte R15 tot R25 miljoen bygedra het tot die plaaslike ekonomie en meer as 100 werksgeleenthede tydens die ekspo in die Overberg-distrik geskep het.

Die Minister van Landbou, John Steenhuisen, het op Vrydag 13 September ’n kort toer deur die ekspo onderneem en ’n paar sleutelgesprekke met vennote gehad, maar het bowenal die gasvryheid en atmosfeer geniet.

“Met meer as 600 uitstallings en ’n nuwe rekord van 542 uitstallers, het NAMPO Kaap die nuutste tegnologie, masjinerie en landbouprodukte aan die Wes-Kaapse gemeenskap en ander besoekers ten toon gestel.

“Die uitbreiding van die uitstalruimte met 38 bykomende erwe het die verhoogde vraag na ruimte aangespreek, terwyl die nuutste landboumasjinerie en tegnologie, insluitend battery-aangedrewe voertuie, op ’n spesiale demonstrasiebaan ten toon gestel is,” vertel Graan SA.

Een van die hoogtepunte van NAMPO Kaap 2024 was die Skaaphond-ekspo, wat saam met die Suid-Afrikaanse Skaaphondvereniging aangebied is. Besoekers het skouklasse en veilings bygewoon, terwyl die Nasionale Toyota Jong Afslaerskompetisie ook vir groot opwinding gesorg het.

’n Spesiale skoolprogram, wat deur die Wes-Kaapse departement van landbou aangebied is, het 500 leerders van 30 skole bymekaar gebring, wat praktiese leerervarings gebied het om hul akademiese kurrikulums aan te vul. Die Overberg Streeksjeugskou, wat op die laaste dag plaasgevind het, het geleenthede gebied vir jong deelnemers om hul vaardighede oor verskeie landboudissiplines ten toon te stel.

“Landbou strek verder as net produksie. NAMPO Kaap speel ’n sleutelrol in die bevordering van landelike ontwikkeling en sosiale groei. Deur ons produsente met moderne tegnologie en kennis te bemagtig, kan ons produktiwiteit en inkomste verhoog.

‘Platform vir netwerkvorming, innovasie en uitruil van kennis geskep’

“Verder skep die integrasie van landbou met sektore soos hernubare energie en biotegnologie nuwe geleenthede vir ekonomiese diversifikasie en innovasie. Dit dra by tot ’n meer volhoubare en robuuste landbousektor vir die toekoms,” het dr. Dirk Strydom, besturende direkteur van NAMPO (Edms.) Bpk, afgesluit.

“NAMPO Kaap 2024 het sy doelwit bereik om ’n platform vir netwerkvorming, innovasie en die uitruil van kennis te skep en bly ’n belangrike bymekaarkomplek vir Suid-Afrika se landbougemeenskap, wat beide huidige en toekomstige generasies produsente inspireer,” sluit die verklaring af.

OFM Agri