Central SA
Polisie soek na verdagtes nadat gesteelde vee in Noord-Kaap teruggevind is─── CHARNÉ VAN DER MERWE 14:10 Thu, 03 Apr 2025
Die Noord-Kaapse polisie soek steeds na verdagtes nadat ’n aantal gesteelde vee in die John Taolo Gaetsewe-distrik teruggevind is.
‘n Boer van die dorp Tsineng het op 16 Maart ontdek dat die heining van sy kraal oopgesny is en van sy vee word vermis, sê sers. Merapelo Pilane.
Die diefstal is by die Tsineng SAPD aangemeld, wat die Noord-Kaapse Provinsiale Veediefstal en Bedreigde Spesies-ondersoekeenheid gevra het om in te gryp.
Volgens Pilane is twee speurders ontplooi om inligting op te volg oor waar die gesteelde diere is. Die beamptes het tien bokke en tien skape opgespoor en teruggekry, wat aan hul regmatige eienaar terugbesorg is.
Foto verskaf
Die polisie gaan voort met hul soektog na die verdagtes wat by die diefstal betrokke was.
Enigiemand wat kan help om die verdagtes op te spoor, moet speursers. Velile Tshabalala by 082 454 3540 nader. Die MySAPS-app kan gebruik word om inligting te deel. Bel Stop Misdaad by 08600 10111. Alle inligting sal vertroulik gehanteer word.
Die Rooivleisprodusenteorganisasie (RPO) en ander landbouorganisasies werk saam met die polisie en Agri Ops om veediefstal te bekamp deur middel van ’n nasionale aanmeldingstelsel vir veediefstal.
Foto verskaf
Die Earth Ranger-platform hanteer en verwerk inligting wat verskaf word om te verseker dat alle besonderhede van deelnemende boere vertroulik gehou word in ooreenstemming met die Wet op die Beskerming van Persoonlike Inligting, sê dr. Frikkie Maré, uitvoerende hoof van die RPO.
Hoewel die platform sonder die polisie se medewerking bedryf word, werk die RPO nou saam met die polisie vir die uitvoering daarvan.
Hoe werk die KI-stelsel?
Agt stappe word tydens aanmelding uitvoer, waarvan die eerste vyf verpligtend is:
1. Wie: Verskaf jou naam en kontakbesonderhede.
2. Provinsie: Dui aan in watter provinsie die voorval plaasgevind het.
3. Distrik: Verstrek die distrik se naam.
4. Polisie: Meld dit by jou naaste polisiekantoor aan.
5. Wat: Beskryf die tipe veediefstal en ander belangrike besonderhede.
Die volgende drie stappe is die GPS-ligging waar die voorval plaasgevind het, spesifieke besonderhede oor hoe die diefstal uitgevoer is en enige ander tersaaklike inligting.
Die RPO beklemtoon dat hierdie stelsel nie net help om veediefstal vinniger aan te meld nie; dit skep ook ’n waardevolle databasis vir wetstoepassingsagentskappe. Die doel is om die polisie te ondersteun in hul ondersoeke en om misdaadtendense beter te verstaan.
Boere en inwoners kan enige veediefstal of verwante misdaad onmiddellik per WhatsApp by 071 515 2011 aanmeld.
OFM Nuus cg
