Central SA
Parkeerterrein-aanranding: Klerksdorper se aanklagte bly onveranderd─── CHARNÉ VAN DER MERWE 10:42 Thu, 06 Feb 2025
Aanklagte teen ’n man van Klerksdorp wat van poging tot moord aangekla word ná ’n dodelike bakleiery in ’n plaaslike parkeerterrein, bly dieselfde ná sprake dat dit verander sou word.
Wernich Botha (33) staan tereg op aanklagte van moord op Hilton Pretorius (32) en poging tot moord omdat hy na bewering PW Roos, ’n sakeman van Klerksdorp, aangeval het.
Die Direkteur van Openbare Vervolging (DOV) het verlede week aangedui dat hulle dalk die aanklag van poging tot moord kan heroorweeg, wat dit moontlik tot aanranding en strafbare manslag kan verander. Die DOV het egter teen hierdie verandering besluit.
Die saak, wat aanvanklik Maandag 27 Januarie in die Klerksdorpse streekhof sou begin het, is uitgestel terwyl gewag is op ’n beslissing van die DOV.
Hilton Pretorius. Foto: Facebook
Botha word daarvan aangekla dat hy Pretorius en Roos in September 2023 in die parkeerterrein van ’n kroeg in Klerksdorp aangerand het. Pretorius het 18 dae later beswyk aan kopbeserings, wat hy tydens die voorval opgedoen het. Roos het van ’n skouerbesering herstel.
Ná die voorval is Botha in hegtenis geneem, maar later borgtog van R2 000 toegestaan.
Nkefi Mthoa, staatsaanklaer, het tydens die uitstel van die saak gesê sy wil haar daaraan onttrek, sonder om ’n rede te verstrek, het Linda Mey, Hilton se ma, vroeër aan OFM Nuus gesê. Gevolglik sal ’n nuwe aanklaer aangestel moet word.
Dodelike liefdesdriehoek? Hilton Pretorius en Natasha Fisher. Foto: Facebook
’n Video van die voorval, wat wyd op sosiale media versprei is, wys hoe Pretorius bewusteloos en vol bloed lê in die parkeerterrein naby Cadillac’s 60s Pub, in die woonbuurt Doringkruin.
Op die beeldmateriaal kan na bewering ook gesien word hoe Roos op die grond inmekaarsak ná ’n enkele vuishou, blykbaar gelewer terwyl hy gepoog het om in die aanranding op Pretorius in te gryp.
Die rusie was glo weens ’n geskil oor Botha se destydse meisie, Natasha Fisher.
