Central SA
Polisie ondersoek twee meisies se verdrinking in Vrystaat─── 10:57 Fri, 17 Jan 2025
’n Geregtelike doodsondersoek sal volg nadat die liggame van twee meisies van Bothaville in die Vrystaat, onderskeidelik sewe en tien jaar oud, deur polisieduikers uit die Valsrivier gehaal is.
Hulle is Donderdag (16/1) as vermis aangemeld nadat hul elfjarige maatjie hulle laas by die rivier gesien het. Die polisie in Bothaville het ’n ondersoek geopen ná die verdrinkings.
#sapsFS Police in Bothaville have opened an inquest following the drowning of two girls aged 7 and 10 years, that occurred at Vals River, Bothaville on 16/01. A third girl (11) managed to cling onto a tree stem. Police divers were summoned to the scene and worked tirelessly to… pic.twitter.com/8M27vFGgUF
— SA Police Service ???? (@SAPoliceService) January 16, 2025
Nadat die voorval aangemeld is, is ’n soektog dadelik van stapel gestuur. Daar word beweer dat die meisies deur waterstrome in die Valsrivier meegesleur is.
Die elfjarige het egter daarin geslaag om aan ’n boomstam vas te klou. Polisieduikers is na die toneel ontbied en het onverpoosd gesoek na die liggame van die oorledenes, sonder sukses.
Die soek-en-reddingspan is versterk met ondersteuning van die polisie se lugvleuel. Twee liggame is gevind en op die toneel deur nooddienspersoneel dood verklaar.
Die twee oorledenes is positief deur hul naasbestaandes uitgeken. Op versoek van die families kan die name van die oorledenes nie bekend gemaak word nie.
In Noordwes het die tweejarige Tshiamo Mompate Woensdag (15/1) naby die Rooikuil-plaas by Hartbeesfontein verdwyn. Sy het ’n grys T-hemp met oranje motiewe en ’n blou denim aangehad.
Enigiemand met inligting kan ao. E. Victor kontak by 060 967 3965. Bel #StopMisdaad by 08600 10111 of stuur inligting op die #MySAPSApp.
OFM Nuus cg/mvh
