Van Maandag (23/12) tot Saterdag (28/12) is 47 zama-zamas op aanklagte van onwettige mynaktiwiteite en die oortreding van die Wet op Immigrasie, Wet 13 van 2002 in hegtenis geneem, sê kol. Adéle Myburgh, Noordwes- polisiewoordvoerder.

Tien zama-zamas het Vrydag (27/12) by die Margaretskag in Stilfontein na die oppervlak gekom en in die vroeë oggendure elf by die Buffelsfonteinskag. Sy sê ondersoeke is aan die gang en Operasie Vala Umgodi sal vir die laaste drie dae van die feestyd voortduur.

Intussen is ses vermeende zama-zamas Vrydag (27/12) in Riverlea en Langlaagte in Johannesburg ná ’n skietgeveg met die polisie in hegtenis geneem. Dié verdagtes sal ook Maandag (30/12) in die hof verskyn.

Die polisie het op die ongelisensieerde vuurwapens beslag gelê. Foto verskaf

Volgens Arrive Alive het die polisie inligting ontvang oor onwettige mynaktiwiteite in Riverlea. Lede van die nasionale ingrypingseenheid het toe met ’n soektog na die verdagtes begin.

Met die polisie se aankoms het hulle gereedskap ontdek wat vir onwettige mynaktiwiteite gebruik word. Die verdagtes het op hulle losgebrand wat tot die skietgeveg gelei het.

‘Nog vier verdagtes is later aangekeer’

Twee verdagtes is op die toneel in hegtenis geneem vir die besit van ongelisensieerde vuurwapens, magasyne en ammunisie. Nog vier verdagtes is later in die gebied aangekeer.

Die ses verdagtes staan tereg op aanklagte van die besit van ongelisensieerde vuurwapens en ammunisie, poging tot moord en onwettige mynaktiwiteite. Daar is ook vasgestel dat al ses verdagtes onwettig in die land is.

OFM Nuus dg