Halimmah Thamando Mnyobisi (38) is een van vier verdagtes wat na bewering by die moord betrokke was, sê sers. Mahlomola Kareli, polisiewoordvoerder. Sy kom na verwagting Donderdag (28/11) voor in die Botshabelo-landdroshof.

Die oorledene, Fezile Mnyobisi (35), se vrou het hom op 15 September verlede jaar na die Botshabelo-hospitaal geneem nadat hy meer as 30 steekwonde opgedoen het. Hy is met sy aankoms dood verklaar.

Halimmah Thamando Mnyobisi, net nadat sy in hegtenis geneem is. Foto: SAPD

Volgens Kareli is die polisie dadelik ontbied en ’n saak van roof en moord is by die Botshabelo-polisiestasie geopen vir verdere ondersoek. Ná ’n intensiewe soektog, onder leiding van ’n spesialisafdeling van die provinsiale kommissaris, is lasbriewe uitgereik wat gelei het tot die inhegtenisneming van drie verdagtes.

Vusumuzi Daniel Nqele (43), Moeketsi Innocent Manko (35) en Abdool Thamando (35), die oorledene se swaer, is Vrydag 8 November aangekeer op aanklagte van moord en sameswering om moord te pleeg. Die verdagtes is in aanhouding en sal na verwagting Dinsdag (3/12) om borgtog aansoek doen.

Kareli sê  aanvanklik is geglo Mnyobisi bestuur ’n swart Mazda CX-5 met onbekende registrasienommers, maar ná verdere ondersoek is vasgestel sy ry met ’n wit BMW.

OFM Nuus cg