Dit volg nadat verskeie leerders van skole in die Vrystaat die afgelope week slagoffers van voedselvergiftiging was.

“In reaksie op hierdie ongelukkige gebeure het die departement vinnig opgetree om ’n breë plan te koördineer wat verskeie rolspelers betrek. Die SAPD en die departement van gesondheid is aktief betrokke en verseker deurlopende assessering en ondersteuning namate meer inligting beskikbaar raak,” het Howard Ndaba, die onderwyswoordvoerder, gesê.

“Die departement het dadelik alle verkopers se aktiwiteite tydelik gestaak. Skoolhoofde en skoolbeheerliggame is verplig om alle aktiwiteite van verkopers wat nie deur die skool bestuur word nie, op en rondom skoolgronde tydelik op te skort om die ondersoek en koördinering van gesondheids- en veiligheidsnakoming te voltooi.”

Dit volg nadat ouers van die Laerskool Ihobe woedend was weens ’n voedselvergiftigingsvoorval waar meer as 40 leerlinge Donderdag (7/11) in die hospitaal opgeneem is nadat hulle glo items van plaaslike spaza-winkels en verkopers gekoop en geëet het.

Ndaba sê dat skole se snoepwinkels en verkopers, wat onder streng toesig van skoolbeheerliggame werk, vrygeskeld is van die opskorting van verkope, maar steeds aan streng veiligheidsprotokolle moet voldoen. 

Die nuwe standaard operasionele prosedures (SOP’s) moet nou geïmplementeer word.

Die departement is besig om ’n omvattende SOP te finaliseer wat daarop gemik is om skooladministrasies te lei in die toesig oor verkopers. Hierdie dokument sal dien as ’n sleutelraamwerk vir die afdwinging van veilige praktyke en sal met skole gedeel word vir vinnige aanvaarding.

• Proaktiewe opvoedkundige maatreëls: Skole word aangemoedig om bewusmakingsprogramme in hul leerplanne te integreer, veral binne Lewensoriëntering-klasse, om leerders in te lig oor voedselsekuriteit en die belangrikheid van ingeligte besluite rakende verbruiksprodukte.
• Ondersteuning vir geaffekteerde leerders: Skoolbestuurspanne moet herstelplanne ontwikkel vir leerders wat deur hierdie voorvalle geraak is, om vir verlore leertyd te vergoed. Verder word daar van skoolveiligheidskomitees verwag om ten volle operasioneel te wees en ’n proaktiewe rol te speel in die toesig oor verkoperpraktyke.
• Ontplooiing van psigososiale dienste: Die departement se psigososiale ondersteuningseenheid sal ondersteuning bied aan geaffekteerde leerders en hul gesinne, sodat hulle hierdie moeilike tyd kan navigeer.

’n Leerder van die Laerskool Ihobe is vandeesweek in die Pelonomi tersiêre hospitaal behandel. Nagenoeg 50 vermeende voedselvergiftigingsgevalle is by dié skool in Bloemfontein aangemeld. Foto: Bloemfontein Courant/Sazly Moses

• Verdere benodigde optrede:
  * Skoolhoofde moet gedetailleerde lyste saamstel van alle gemagtigde verkopers wat op of naby skoolpersele mag handel dryf.
  * Distriksdirekteure sal hierdie lyste aan omgewingsgesondheidinspekteurs oorhandig vir deeglike evaluasie en inspeksies.
  * Die Nasionale Skoolvoedingsprogram se amptenare sal ’n deurlopende toesigskedule van verkopers handhaaf, in samewerking met die departement se hoofkantoor, om voedselveiligheidstandaarde te handhaaf.

Onderwys LUR dr. Mantlhake Maboya bedank die premier en alle betrokke regeringsdepartemente vir hul vinnige en toegewyde reaksie.

OFM Nuus cg