Central SA
VF Plus in Sol Plaatje wend hom tot MRK weens rioolstorting – VIDEOS─── 15:45 Fri, 19 May 2023
Die VF Plus in die Sol Plaatje Plaaslike Munisipaliteit (Kimberley, Ritchie) het ’n klagte by die Menseregtekommissie (MRK) teen die onwettige storting van riool ingedien.
Rioolstorting wat die grondwater besmet en natuurlewe verwoes, is een van die groot probleme in Sol Plaatje.
Die VF Plus sê in ’n verklaring hulle het Donderdag 18 Mei 2023 saam met Anthony Wyngaard van die MRK die probleemgebiede besoek.
Verskeie woongebiede word geraak omdat die rioolsuiweringsaanlegte nie behoorlik funksioneer nie.
Die Glen-rioolpompstasie, aan die westekant van Kimberley, is al vir etlike jare nie meer funksioneel nie. Die bou van ’n nuwe rioolsuiweringsaanleg is weens wanbetaling nog nie voltooi nie.
Die Homevale-rioolsuiweringsaanleg werk ook nie behoorlik nie. Die gevolg is dat onverwerkte rioolvuil langs Hillcrest en die Gariep-hospitaal verbystroom. Inwoners van die woonbuurte in die omgewing moet daagliks met hierdie stank saamleef.
Onverwerkte rioolvuil wat van Galeshewe en omliggende woonbuurte afkomstig is, vloei vir kilometers deur die veld tot anderkant Platfontein, onderdeur die R31-pad.
In 2022 is besluit om die R31, teen hoë koste, te lig, eerder as om die aanleg te herstel.
Kamfersdam word ook hierdeur geraak. Die vlakke styg onnatuurlik en dit hou ’n bedreiging in vir die flaminke wat daar broei.
Die verhoogde watervlak van die pan hou ook gevolge in vir die Kimberley-Kathu-spoorlyn.
De Beers se wildplaas word ook geraak omdat die twee pompe wat gesuiwerde rioolwater na die Vaalrivier moes wegpomp, verwyder is. Die rede daarvoor is onbekend.
Die ondersoek, in samewerking met die MRK, duur voort.
Greenpoint se rioolsuiweringsaanleg sal onder meer besoek word. Hierdie aanleg werk al vir drie jaar nie meer nie.
Die VF Plus sal aanhou om voorkeur aan hierdie probleem te verleen.
