Suid-Afrika is besig om sy landbou-uitvoere binne die Brics-streek uit te brei, met die klem op nuwe geleenthede wat hierdie groepe kan bied. Die land is tans die 32ste grootste uitvoerder van landbouprodukte wêreldwyd, maar slegs 8% van Suid-Afrika se uitvoere is na die oorspronklike Brics-lande, naamlik Brasilië, Rusland, Indië, China en Suid-Afrika self.

Volgens die hoofekonoom van die landbousakekamer (Agbiz), Wandile Sihlobo, kan hierdie getal verhoog word, veral in die lig van onlangse gesprekke by die Brics Besigheidsraad se jaarlikse konferensie wat verlede week in Moskou plaasgevind het.

Die politieke leiers van die Brics-lande vergader tans  in Kazan, Rusland, om verder te besin oor sake wat tydens die besigheidsvergaderings bespreek is. Landbou en landbousake was ’n belangrike tema.

“Die Brics-lande sluit van die wêreld se belangrikste landboukragte in, soos Brasilië en Rusland in graan, Indië in rys, en natuurlik Suid-Afrika,” sê Sihlobo. Tog is daar steeds uitdagings wat die handel tussen hierdie lande belemmer.

Een van die groot struikelblokke vir diepere handel binne Brics is die hoë invoertariewe en fitosanitêre hindernisse. Sihlobo verduidelik dat hierdie struikelblokke dikwels verband hou met streng vereistes oor hoe produkte verbou en verwerk word, wat die uitvoer na sekere lande bemoeilik.

“Ons moet saamwerk om hierdie hindernisse te verlaag en sodoende ons landbouhandel binne Brics te versterk,” voeg hy by.

Die politieke leiers van die Brics-lande tydens die 16de jaarlikse beraad in Kazan, Rusland. Foto: BRICS Summit

Suid-Afrika voer tans ongeveer die helfte van sy landbouprodukte uit, ter waarde van $13,2 miljard in 2023. Hoewel Brics-markte belangrik is, is Suid-Afrika se belangrikste uitvoermarkte tans die Afrika-kontinent (40%), die Europese Unie (19%) en die Midde-Ooste en Asië (24%).

Ten slotte beklemtoon Sihlobo dat die bevordering van landbou-uitvoere na Brics nie beteken dat ander markte afgeskeep moet word nie. “Ons moet voortgaan om sterk bande te bou met die EU, die VK, die VSA, en ander potensiële markte soos Suid-Korea, Japan, en Viëtnam,” sê hy.

‘Meer strukturele verhoudings nodig’

Dit is noodsaaklik vir Suid-Afrika om sy uitvoermarkte te diversifiseer, veral met die land se onderbenutte grond wat tot 2,5 miljoen hektaar beloop en verdere produktiwiteitsverbeteringe in die landbou.

Sihlobo benadruk dat diepere integrasie met Brics ook deel moet wees van Suid-Afrika se langtermyndoelwitte en dat dit meer as net ’n politieke groep moet wees. “Ons het meer strukturele verhoudings nodig, insluitende ’n potensiële Brics-landbouhandelsamewerking,” sê hy.

OFM Agri/Robyn Schutte mvh