Die Landbank se Raad het die suksesvolle afsluiting van die skuldherstruktureringsoplossing met al sy krediteure aangekondig. Op ’n mediakonferensie in Centurion is gesê amptelike kennisgewings is uitgereik, wat die implementering van die oplossing bevestig.

Ná die ondertekening van wetlike ooreenkomste en die vervulling van alle voorwaardes, sal die herstruktureringsoplossing op 16 September 2024 in werking tree. Dit sal die Landbank se skuldverpligtinge finaal beëindig.

In ’n verklaring verduidelik die bank die herstrukturering sluit verskeie finansiële instrumente van al die bank se kredieture in, wat verseker dat alle skuldeisers gelyk behandel word, ongeag die tipe skuld of die wetgewing waaronder dit val. Die terugbetalings aan skuldeisers sal elke ses maande plaasvind tot Maart 2028. Die regering se kapitaalbydrae speel ’n sleutelrol in hierdie plan, wat die Landbank op ’n volhoubare pad vorentoe plaas.

Thabi Nkosi, voorsitter van die raad, meen dit was een van die mees ingewikkelde en langdurige skuldherstruktureringsprosesse in Suid-Afrika se finansiële geskiedenis. “Om ’n groot aantal skuldeisers te koördineer, wat bestaan uit plaaslike krediteure, ’n multilaterale ontwikkelingsfinansieringsinstelling en internasionale banke, asook verskillende tipes skuldinstrumente en -termyne, het die uitdaging vergroot.

“Gelukkig het alle partye merkwaardige geduld en goedertrou getoon, en die skuldeisers het die stilstandreëling gerespekteer sedert die Bank in gebreke gebly het. Ons glo dat die oplossing wat ons bereik het, in die beste belang van alle belanghebbendes en die landbousektor is.”

Minister van Finansies, Enoch Gondongwana, het ook die verminderde sosio-ekonomiese impak van die bank erken weens die tydelike opskorting van sy leningsaktiwiteite, maar het die regering se versigtige benadering beklemtoon.

“Die regering het R10 miljard voorsien om die situasie te stabiliseer en die staat se voorwaardelike verpligtinge te verlig deur die staat-gewaarborgde skuldeisers af te betaal, en om R3,7 miljard van hierdie fondse toe te deel aan die Gemengde Finansieringskema om die Bank se landbou-ontwikkeling en transformasie-mandaat te ondersteun.

“Ons het ook verseker dat die Bank selfhulpmaatreëls gevind het terwyl fiskale ondersteuning tot die minimum beperk is. Die Bank se befondsingsmodel bly ’n prioriteit vir die toekoms.”

Die Bank het sedert sy skuldverpligtinge in April 2020 groot uitdagings in die gesig gestaar, maar daar is verskeie sleutelmylpale bereik:

• Skuldvermindering: Sedert die skuldverpligting het die Bank meer as 60% van sy skuld afbetaal. Dit is bereik deur kontantopbrengste van ’n doelbewuste vermindering van die bank se leningsboek, wat van R45,2 miljard in Maart 2020 na R17 miljard teen Junie 2024 verminder is.
• Leningsaktiwiteite: Ondanks die verkleining het die Landbank beperkte leningsaktiwiteite in Oktober 2022 hervat deur die Gemengde Finansieringskema, wat ondersteun word deur toelaagfinansiering van die Departement van Landbou.

In die 2023-boekjaar het die bank begin om sy omkeerstrategie te implementeer, wat in drie fases verdeel is:

1. Stabilisering (FY23-FY24): Fokus op die balansering van skuldterugbetalings en die herinstelling van beperkte lenings.
2. Konsolidasie (FY25-FY27): Hierdie fase konsentreer op die verbetering van bedrywighede en strategiese uitvoering ná die sukses van die skuldoplossing.
3. Groeifase (FY28 en daarna): Die Bank sal mik na ’n meer gediversifiseerde befondsingsmodel en besigheidsgroei, met ’n fokus op uitgebreide ontwikkelingsuitkomste.

Met die voltooiing van die skuldoplossing, fokus die Landbank nou ten volle op die implementering van sy Omkeerstrategie om sy mandaat uit te voer en ontwikkeling en transformasie in die landbousektor aan te dryf. Die nuwe bedryfsmodel, gelei deur die uitvoerende hoof en die uitvoerende span, met sterk steun van die Raad, sal sentraal staan in hierdie pad vorentoe.

Verklaring verskaf