Die verdagtes is Sondag (23/2) in hegtenis geneem nadat Calvin Johnson (50) omstreeks 18:00 voor ’n huis in Dr. Belcherweg noodlottig geskiet is, sê. ao. Mahlomola Kareli, Vrystaatse polisiewoordvoerder. Johnson het ’n kopwond opgedoen.

Johnson se is doodgeskiet ná ’n vreedsame protesoptog vroeër die dag deur verskeie gemeenskapslede na die Heidedal se polisiekantoor. Inwoners het opgeruk om ’n klag in te dien nadat ’n sersant en ’n konstabel Steffney Booysen ’n maand vroeër na bewering aangerand het toe sy ’n klagte van gesinsgeweld aanhangig wou gemaak het.

‘Ooggetuies het twee voertuie van die toneel sien wegjaag’

’n Paar uur later is skote gehoor naby die roete wat die betogers gevolg het. Ooggetuies het twee voertuie – ’n swart Volkswagen Amarok en ’n silwer luikrug – van die toneel sien wegjaag, sê Kareli.

Die polisie is ontbied, en ’n moordsaak is by die Heidedal-polisiekantoor geopen.

“Danksy die vinnige en gekoördineerde pogings van Parkweg se misdaadvoorkomingseenheid en die Bloemfonteinse blitspatrollie is die Amarok by ’n vulstasie aan Nelson Mandelarylaan opgemerk.”

‘Soektog na die ander voertuig duur voort’

Kareli sê die polisie het beslag gelê het op ’n vuurwapen, wat aan een van die verdagtes behoort, en dit vir ballistiese toetse weggestuur.

Die soektog na die ander voertuig en sy insittendes duur voort. Die polisie doen ’n beroep op inwoners om waaksaam te bly en nie die verdagtes te konfronteer nie, aangesien hulle as gewapen en gevaarlik beskou word.

Enigiemand met inligting oor die voorval, kan kapt. Jacques Wilson by 061 501 8007 nader, óf Stop Misdaad by 08600 10111 bel.

Molebogeng Marumo (38) en Mamorena Shuping (28) van die Heidedal-polisiekantoor in Bloemfontein moet weer Vrydag 7 Maart in die Bloemspruit-landdroshof verskyn.

Die beamptes is Donderdag 6 Februarie in hegtenis geneem nadat beeldmateriaal van die aanranding wyd op sosiale media versprei is. Hulle het tydens hul vorige hofverskyning borgtog van R1 000 elk gekry.

OFM Nuus mvh