Karien Marx (58) se saak is met haar eerste hofverskyning Maandag (18/11) vir verdere ondersoek uitgestel.

Sy is daardie dag in hegtenis geneem op aanklagte dat sy bedrieglike eise ingedien het by die departement van arbeid vir tydelike werknemersverligtingsvoordele (Ters) van meer as R1 miljoen deur haar maatskappy, Pop Snax (Edms.) Bpk., sê Christopher Singo, Vrystaatse Valke-woordvoerder.

Marx is borgtog van R5 000 toegestaan.

Khahliso Isabel Motseremeli (48). Foto verskaf

“Die departement het die toekenning goedgekeur en in die maatskappy se rekening gedeponeer. Blykbaar is net ’n breukdeel aan werknemers betaal en die res vir persoonlike uitgawes gebruik.”

Nog ’n vrou, Khahliso Isabel Motseremeli (48), het Maandag in dieselfde hof voorgekom op soortgelyke aanklagte. Sy is vrygelaat op borgtog van R1 000 en moet weer op 18 Januarie in die hof verskyn.

Motseremeli het na bewering van Maart tot April 2020 eise ingedien by die departement van onderwys vir Covid-19-verligting vir haar organisasie sonder winsoogmerk, Paballong-dagsorgsentrum. Na bewering was die eise namens werknemers wat nie vir Ters-betalings in aanmerking gekom het nie. Na bewering het sy die R36,247,05 in haar sak gesteek.

OFM Nuus cg