Click on the warning image to view this post
Central SA
Man doen breinbeserings op in bakleiery in Klerksdorp─── HEIDRÈ MALGAS 11:42 Wed, 06 Sep 2023
In die video kan gesien word hoe die man probeer om die slagoffers te help nadat hy hulle aangerand het.
Die polisie ondersoek ’n saak van poging tot moord nadat ’n video van ’n bakleiery op sosiale media versprei is. Drie mans was Sondagmiddag by ’n voorval in ’n parkeerterrein in Doringkruin, Klerksdorp, betrokke en twee van hulle was bewusteloos toe hulle in die hospitaal opgeneem is.
Adéle Myburgh, polisiewoordvoerder van Noordwes, sê volgens hul inligting het ’n man twee ander mans aangerand. Een het ernstige breinbeserings opgedoen.
“Die tweede slagoffer was vroeër by die polisiekantoor om ’n saak aanhangig te maak,” sê sy.
In die video op Nuuspod kan gesien word hoe die man probeer om die slagoffers te help nadat hy hulle aangerand het.
Myburgh sê die verdagte is bekend aan die polisie en sal binnekort in hegtenis geneem word. Dit is nog onbekend waaroor hulle baklei het.
OFM Nuus
