OPDATERING: Die saak teen twee polisievroue van die Heidedal-polisiestasie in Bloemfontein sal op Vrydag 2 Mei in die Bloemspruit-landdroshof hervat word nadat dit Vrydag (4/4) vir verdere ondersoek uitgestel is.

***

Molebogeng Marumo (38) en Mamorena Shuping (28) is albei op borgtog van R1 000 vrygelaat ná hul eerste hofverskyning. 

Die beamptes is op Donderdag 6 Februarie in hegtenis geneem nadat beeldmateriaal van die voorval in die polisiekantoor op sosiale media versprei het. “Die saak is tot Vrydag uitgestel vir verdere ondersoek en om die Openbare Vervolger se besluit af te wag,” sê Mojalefa Senokoatsane, woordvoerder van die Vrystaatse Nasionale Vervolgingsgesag (NVG). 

‘’n Argument het uitgebreek wat glo tot die aanranding gelei het’

“Die polisiebeamptes is op borgtog van R1 000 vrygelaat ná hul eerste hofverskyning.”

Steffney Booysen het op Sondag 19 Januarie die polisiekantoor besoek en hulp gevra om ’n klag teen haar lewensmaat te lê, maar ’n argument het tussen haar en die polisiebeamptes ontstaan, wat glo tot die aanranding gelei het. 

Booysen beweer dat een van die polisiebeamptes haar verskeie kere in die rug geskop het. Sy sê sy ervaar nou erge pyn en sukkel om dinge alleen te doen.

Police officers assault a woman, believe to be a complainant in a domestic violence case, at the Heidedal Police Station, Free State.@RSA_IPID @SAPoliceService

?? Graphic. pic.twitter.com/Ind8zFcig2

— Yusuf Abramjee (@Abramjee) February 4, 2025

“Dit is nie die eerste klag oor die Heidedal-polisiestasie nie. Inwoners kla dat die kantoor gereeld gesluit is tydens nagskofte,” sê Attie Terblanche, Mangaung DA-raadslid. 

“Beamptes is nie in staat om op noodgevalle te reageer nie weens ’n tekort aan voertuie en die dienslewering is oor die algemeen onbevredigend.”

Intussen is ’n ander Vrystaatse vrou na bewering deur ’n besope polisiemajoor aangerand toe sy probeer het om ’n diefstalklag in te dien. Kenalemang Mokhoabane (32) is glo op Donderdag, 27 Februarie, deur die majoor in haar huis by die Caleb Motshabi informele nedersetting aangeval.

Opod het bevestig dat hulle die voorval ondersoek waarin Mokhoabane beweer dat sy aan haar rok gegryp is, in die gesig en op haar ore geslaan is, en verskeie kere geskop is. Mokhoabane wou glo ’n diefstalklag by die Kagisanong-polisiestasie indien. 

Op die dag van die aanranding het die polisiemajoor haar glo gebel om haar adres te vra en gesê hy is op pad na haar huis. Mokhoabane sê hy het egter ure later daar aangekom en dronk gelyk voordat hy haar glo aangerand het.

OFM Nuus het vroeër berig dat die polisiemajoor ’n klag van aanranding teen Mokhoabane ingedien het, wat tot haar inhegtenisneming gelei het, maar haar saak is nie op die hofrol geplaas nie,” sê Phaladi Shuping, Opod-woordvoerder.

OFM Nuus/Zenande Mpame mvh