Central SA
‘Kind wat geboorte skenk, is nie nét kommerwekkend nie ...’─── 09:52 Thu, 22 Jun 2023
Die kinderregte-organisasie Teddy Bear Clinic sê tienerswangerskap moet as ’n pandemie in Suid-Afrika verklaar word, aangesien ál hoe meer kinders wat nog nie eens puberteit bereik het nie, swanger raak.
Dit volg nadat die Noord-Kaapse departement van opvoeding kommer uitgespreek het nadat meer as 3 000 leerders swanger geraak het tussen laasjaar en Maart vanjaar.
Die provinsie se statistieke toon dat hierdie kinders tussen die ouderdomme van 10 en 19 is.
“As ’n 10-jarige geboorte skenk, moet ons hierdie as ’n pandemie verklaar.
“ ’n Kind wat geboorte skenk is nie net kommerwekkend nie, dis ontmoedigend, dis sielvernietigend. Daardie kind en die baba word beroof van alle geleenthede. Die fisiese en sielkundige gevolge is lang-termyn en sal hulle hul lewe lank volg,” sê Shaheda Omar, kliniese direkteur van Teddy Bear Clinic.
