Central SA
Noord-Kaap wil R9 miljard aan infrastruktuur bestee─── 17:59 Fri, 03 Mar 2023
Die provinsiale regering van die Noord-Kaap gaan sowat R9 miljard aan die ontwikkeling van en belegging in infrastruktuur belê, het die premier, dr. Zamani Saul, Donderdag tydens sy provinsiale rede bekend gemaak.
Hy het die rede in Calvinia in die provinsie se Namakwa-distrik gelewer.
SAnews.gov.za berig dat hierdie projekte sal fokus op die bou van skole, gesondheidsgeriewe, paaie, behuising, energie, water en sanitasie.
Hy sê infrastruktuurprojekte sal deur bykomende befondsing ‘n hupstoot kry om die doelwit van ekonomiese groei te verwesenlik.
“Belegging in infrastruktuur is die ruggraat van ’n florerende ekonomie.”
Paaie kry ook aandag
Saul sê die Noord-Kaap se padinfrastruktuur sal ook aandag geniet, al is die begroting onvoldoende om provinsiale paaie te diens.
“Die provinsie het in November 2022 altesame 16 paaie aan Sanral (die Suid-Afrikaanse nasionale padagentskap) oorgedra en dit sal ons help om op paaie wat hoofsaaklik deur plaaslike motoriste gebruik word, te fokus.
“Sanral gaan 'n kantoor in die Noord-Kaap open wat sal help om die fokus op ons paaie te versterk, wat van kritieke belang is vir die sukses van ons provinsiale en die nasionale ekonomie.
