Rugby
Habebe hang stewels op ná skorsing─── MORGAN PIEK 08:51 Thu, 21 Jul 2016
Die Sharks-haker, Monde Hadebe, het sy uittrede uit rugby aangekondig nadat hy vir vier jaar uit die sport geskors is weens die gebruik van anaboliese steroïedes.
Die Suid-Afrikaanse Instituut vir Dwelmvrye Sport het bevestig die 25-jarige Hadebe sal eers ná Mei 2020 sy loopbaan kan hervat.
Hadebe het in 2010 vir die Springbok o.20 span tydens die Junior Wêreldbeker uitgedraf.
Die Bulls het op hul beurt bevestig dat die stut, Nqobisizwe Mxoli, wat Saterdagaand teen die Toyota Cheetahs vanaf die plaasvervangersbank gespeel het, ook positief getoets het vir die gebruik van ‘n verbode middel.
Mxoli was ‘n lid van die 2014 Springbok o.20-span wat aan die Wêreldbeker deelgeneem het en hy sal egter sy skorsing appélleer.
’n Speler van die Southern Kings, wat vroeër die seisoen ’n senior nasionale span verteenwoordig het, het ook onlangs positief getoets. Daar was geen Kings-spelers in die Springbokspan nie, maar daar was vier in die Suid-Afrikaanse A-span.
Talle jong spelers is ook geskors en hulle sluit in die Grens se Chase Benito en die o.21-losvoorspeler van Griekwas, Nico Graaff.
Morgan Piek/OFM-nuus
