Luidens die jongste Agriseker Cumulus-verslag word daar uitgebreide wolkbedekking en hoë atmosferiese vogvlakke verwag, wat dagtemperature onderdruk en minimumtemperature matig sal hou.

Die maksimumtemperature oor die Oos-Hoëveld sal op verskeie dae onder 20 °C bly, terwyl minimumtemperature oor die algemeen bo 10 °C behoort te wees. Weens bogenoemde toestande sal toestande vir gewasbestuur en veldtoegang uitdagend wees, met ’n verhoogde risiko vir swaminfeksies en verminderde hitte-eenhede vir gewasontwikkeling.

Reën strek tot in die winterreënvalgebied

’n Reeks verlengings van die boonste lae druk (lugtrog) en laedrukstelsels beweeg oor die westelike en suidelike dele van die land, wat reënval oor verskeie dae ondersteun. Reën en donderbuie word selfs tot in die winterreënvalgebied verwag – die tweede keer binne ’n maand dat hierdie streek reën kry van somerstelsels, en nie kouefronte soos gewoonlik nie.

Hoewel donderstorms gedurende hierdie tyd van die jaar geneig is om hael in te sluit, dui die huidige verspreiding van lugmassa en windprofiele nie op ’n hoë risiko vir wydverspreide of intense swaar storms nie. Reënval sal egter steeds bo normaal wees vir die tyd van die jaar.

Weerimpak op graanproduserende gebiede

Die somer-graanproduksiestreek gaan aanhou reën kry met gereelde donderbuie en sagte, bewolkte toestande. Wind sal in die westelike dele soms matig tot sterk wees. Tot Woensdag volgende week kan die reënval in dele van die sentrale tot westelike streek 100 mm oorskry.

Temperatuurvooruitskatting:

• Oostelike graangebiede: Maksimumtemperature tussen 13 °C en 27 °C, minimumtemperature tussen 11 °C en 14 °C.
• Westelike graangebiede: Maksimumtemperature tussen 16 °C en 27 °C, minimumtemperature tussen 14 °C en 18 °C.

Daaglikse voorspelling:

• Donderdag 3 April: Gedeeltelik bewolk tot bewolk en warm met verspreide buie en donderbuie. Matige tot vars noord- tot noordwestewinde oor die westelike en sentrale dele.
• Vrydag 4 April: Gedeeltelik bewolk tot bewolk en sagte reën met verspreide buie en donderbuie. Wind bly noordwes en matig tot vars.
• Saterdag 5 April: Gedeeltelik bewolk tot bewolk en sagte reën met plek-plek donderbuie. Noordelike winde oor die westelike dele.
• Sondag 6 April: Gedeeltelik bewolk tot bewolk en sagte reën met verspreide tot wydverspreide buie en donderbuie, maar geïsoleer in die noordooste. Vars tot sterk noordewinde oor westelike en sentrale dele.
• Maandag – Woensdag (7–9 April): Aanhoudend bewolk en koel met sagte reën tot wydverspreide buie en donderbuie, veral oor die sentrale en westelike dele. Reën sal teen Woensdag na die noordooste uitbrei, met ’n opklaring vanaf die weste teen die middel van die week.

Geen ernstige koue voorsien nie – vir eers

Hoewel daar teen die middel van volgende week moontlike kouer lug uit die suide kan intrek, dui modelle tans nie op ’n ernstige koue gebeurtenis of ryp oor die binneland nie. Teen Woensdag kan daar egter ’n verhoogde risiko vir lae minimumtemperature in die suidooste wees, hoewel die voorspelling nog onseker is.

Ná die middel van volgende week behoort toestande oor die binneland op te klaar met ’n herstel in dagtemperature. Tog toon weermodelle dat someragtige sirkulasiepatrone sal voortduur, wat die kans op verdere reënval lewendig hou. Indien toestande later in April droër word, kan dieselfde patrone moontlik lei tot ryptoestande oor die binneland – maar dit bly onseker.

OFM Agri cg