Vyf verdagtes tussen die ouderdomme van 24 en 48 is in Welkom gearresteer en aangekla van die besit van vermoedelik goudhoudende materiaal en goudverwerkingsapparatuur, met ’n bykomende klag van oortreding van die Immigrasiewet. 

Volgens die Vrystaatse polisiewoordvoerder, Thabo Covane, het die Vala Umgodi-span verskeie operasies uitgevoer – insluitend patrollies te voet, met voertuie, lug-tot-grond hommeltuigpatrollies en stop-en-deursoekoperasies – Holdingstraat in Riebeckstad, Phomolong-Rheederpark in Welkom, Mahlaranghlengin Allanridge en G-Hostel in Thabong Uitbreiding 4. 

Items wat deur die Operasie Vala Umgodi-span by G-Hostel in Thabong gekonfiskeer is. Foto verskaf

“Die polisie het 19 kg suurstofsilinders (4), 9 kg gasbottels (3), groen-rooi-bruin verbindingspype, snybranders en spuite, staalplate, gegalvaniseerde staaldromme, sifdraaie en smeltpotte gekonfiskeer. Lede het ook 45,76 kilogram gouddraende materiaal in beslag geneem.”

Die verdagtes sal binnekort in die hof verskyn.

Smeltbeker met goudhoudende amalgaam. Foto verskaf

OFM Nuus het vroeër berig dat onwettige mynbedrywighede by die Stilfonteinmyn in die Noordwes ’n groot kopseer vir die Vrystaatse polisie veroorsaak.

Kol. Nontando Ndzotyana, die Vrystaatse leier van die Vala Umgodi Taktiese Gesamentlike Operasionele Sentrum, het voorheen lig gewerp op die situasie en Stilfontein as ’n “groot uitdaging” beskryf. Sy het verduidelik dat dit dien as ’n spilpunt vir onwettige mynwerkers, bekend as “zama-zamas”, wat van daar af na die Vrystaat beweeg.

Sy het verder uitgewys hoe onwettige mynwerkers die berugte Stilfonteinskag gebruik om ondergrondse toegang te verkry en dan sowat ’n week lank ondergronds stap tot hulle by die myne in Welkom uitkom, waar hulle waardevolle minerale ontgin.

OFM Nuus/Kekeletso Mosebetsi mvh