Die 36-jarige man, wat nie ingevolge die wet genoem kan word totdat hy skuldig gepleit het weens die seksuele misdryf-aanklagte nie, is Maandag (21/4) in Boitekong naby Rustenburg in hegtenis geneem, sê brig. Sabata Mokgwabone, Noordwes-polisiewoordvoerder.

Die verdagte, wat  glo verantwoordelik vir vyf verkragtings en nege gewapende rooftogte, het reeds Woensdag (23/4) sy eerste verskyning in die Rutenburg-landdroshof gemaak. Volgens Mokgwabone het lede van die polisie se taktiesereaksie-eenheid, saam met die eenheid vir openbare orde, die verdagte se voertuig Maandag in Boitekong opgespoor en voorgekeer. 

‘Die verdagte is met die vyf verkragtings en nege gewapende rooftogte verbind’

Tydens die soektog het hulle ’n nagemaakte vuurwapen, handsakke en selfone ontdek. Hy sê dit is later bevestig dat van hierdie items aan een van die beweerde slagoffers behoort. 

“Ná verdere ondersoek deur Rustenburg-speurders en die eenheid wat spesialiseer in gesinsgeweld, kinderbeskerming en seksuele misdrywe, is die verdagte met die vyf verkragtings en nege gewapende rooftogte verbind.”

Mokgwabone  sê daar word beweer dat hierdie misdade tussen Januarie en Maart 2025 in die Rustenburg-, Boitekong- en Phokeng-gebiede plaasgevind het. “Die verdagte word daarvan beskuldig dat hy sy slagoffers ritte aangebied het en hulle dan na geïsoleerde plekke geneem het waar hy hulle met ’n vuurwapen sou dreig, beroof en seksueel aanrand.”

Verdere aanklagtes

Benewens die aanklagte van verkragting en roof, staan die verdagte ook tereg op ’n aanklag van die besit van vermoedelik gesteelde goedere.

Genl.maj. Patrick Asaneng, waarnemende polisiekommissaris in Noordwes, het die toegewyde multidissiplinêre span geloof vir hul pogings om die verdagte vas te trek.

OFM Nuus mvh