Die Vrystaatse polisie soek steeds na twee verdagtes wat ’n man op 22 Maart op die N1 naby die Southpark-stortingsterrein in Bloemfontein doodgeskiet het, sê ao. Mahlomola Kareli, polisiewoordvoerder.

OFM Nuus het vroeër berig beamptes is omstreeks 07:00 na die toneel ontbied waar hulle die 46-jarige man se lewelose liggaam met skietwonde gevind het. Nog ’n man (48), wat ten tyde van die voorval saam met die oorledene was, was ook naby die toneel maar in erge skok.

Met baksteen teen die kop geslaan

Kareli sê die twee mans het die oggend met hul fietse werk toe gery toe hulle deur die twee onbekende verdagtes, wat langs die pad gestap het, genader is. “Die oorledene het na bewering probeer om verby een van die verdagtes te ry toe laasgenoemde hom met ’n baksteen teen die agterkop geslaan het. 

“Hy het gevolglik van sy fiets afgeval. Die tweede verdagte het toe glo op hom losgebrand.”

Volgens Kareli het die 48-jarige man van sy fiets afgespring en van die toneel gevlug. Hy het die fiets agtergelaat. 

Oorledene twee keer geskiet

Die verdagtes het die twee fietse gesteel en gevlug. “Een is beskryf as ’n silwerkleurige fiets, en die ander as ’n blou-en-wit bergfiets. 

“’n Sekuriteitsvoertuig wat in die omgewing was, het die 48-jarige man bygestaan en die polisie ontbied.”

Hy sê die oorledene is twee keer geskiet – een keer in sy rug aan sy linkersy en een keer in sy linkerhand. Die polisie ondersoek ’n saak van moord en gewapende roof.

OFM Nuus cg