Die Noord-Kaapse polisie doen ’n beroep op enigiemand met inligting wat kan help met die inhegtenisneming van die verdagtes wat met drie liggame gevlug het, om die polisiestasie te kontak. 

Die polisie gaan voort met hul ondersoek na die sakeroof wat op Maandag, 17 Maart, by ’n privaat lykshuis in Kuruman plaasgevind het. Die verdagtes het gevlug met die liggame van twee volwasse mans (37 en 60) en ’n tien-dag-oue baba wat dieselfde dag begrawe sou word.

“Tot op hede is daar geen inhegtenisnemings gemaak nie, en die vermiste liggame is nog nie opgespoor nie,” sê Sergio Kock, die Noord-Kaapse polisiewoordvoerder. “Die ondersoekspan werk onverpoosd en volg alle leidrade in verband met die saak op.”

“Op die betrokke dag het onbekende mans ’n wagkamer by die begrafnisonderneming binnegegaan en die sekuriteitswag aangerand, vasgebind en geblinddoek voordat hulle met drie liggame gevlug het.”

Enigiemand met inligting wat die polisie kan help om die oortreders op te spoor en in hegtenis te neem, kan lt.kol. Doggy Magugu kontak by 082 469 0578 of die misdaadstopnommer 08600 10111 skakel.

Die naasbestaandes van die oorledenes wie se liggame by Motheo wa Bophelo-begrafnisonderneming in Kuruman gesteel is, hoop dat hul oorblyfsels gevind sal word sodat hulle waardige begrafnisse vir hul geliefdes kan reël. Die eienaar van die begrafnisonderneming, James Mangate, het die voorval as “onmenslik” en “uiters ontstellend” beskryf vir die naasbestaandes, hul personeel en die gemeenskap.

“Ons kan sê dat die polisie ’n taakspan saamgestel het, en ons het riglyne gegee oor waar hulle kan soek en waar hulle nie hoef te soek nie, volgens ons ervaring in die begrafnissektor,” sê Johan Rousseau, voorsitter van die Funeral Industry Reformed Association.

“Die begrafnisonderneming het selfs privaat instansies betrek om hulle te help om vir die families afsluiting te bring en die proses te bespoedig.”

Hy sê hy glo families kan vertrou op die vermoë van die betrokke begrafnisonderneming en dat hulle alles in hul vermoë doen om die saak op te los.

OFM News/Zenande Mpame mvh