Beroepspanne het Maandag (17/3) die skade bepaal nadat ’n wolkbreuk Sondagaand tot oorstromings gelei het. Volgens die spanne het die oorstroming geen uitwerking op die strukturele elemente of ingenieurswerk van die winkelsentrum gehad nie, maar wel op kartonhouers wat op die grond gestaan en beskadig is.

Blykbaar het 54 mm reën op Sondag (16/3) binne ’n uur uitgesak, wat tot die oorstromings van die Riverstone Mall gelei het. Die sentrum se beplande opening op Donderdag 27 Maart is nou die weegskaal.

“Huurders moet hierdie voorraad opnuut bestel, aangesien dit deur versekering gedek word,” sê Ivan Pretorius, stigter en uitvoerende hoof van die ontwikkelaar Alley Roads. “Ons span sal vanmiddag met die huurders in gesprek tree om te bepaal of hulle die opening met 14 dae wil uitstel om beskadigde voorraad te vervang.

“Aangesien niks verdere reën die volgende paar dae voorspel word nie, gaan normale werksaamhede op die terrein voort. Spanne is besig met die voltooiing van teerwerk en landskapverbetering. Danksy die vinnige optrede van almal op die terrein is die water gestop, en die skoonmaakproses is aan die gang.”

Die onverwagte stortvloed water het ’n ophoping van puin, sand, klippe en takkies veroorsaak, wat ’n stormwaterpyp naby die Checkers-ingang geblokkeer het. Gevolglik het die water opgedam en die hoofwandelgebied sowel as die winkels naaste aan die ingang oorstroom, sê Pretorius.

Video’s van die oorstroomde winkelsentrum het Sondagaand op sosiale media versprei toe gebruikers hul skok uitgespreek het, aangesien hulle lank reeds uitsien na die sentrum se opening.

Blykbaar het 54 mm reën op Sondag binne ’n uur uitgesak, wat tot die oorstromings van die Riverstone Mall gelei het. Foto: Facebook/Midvaal Community

Alley Roads sê die winkelsentrum het 1 200 werksgeleenthede tydens die boufase geskep, en nog 250 permanente poste word verwag sodra hulle begin handel dryf.

Checkers Fresh-X, Woolworths Food en Dis-Chem is die winkelsentrum se ankerwinkels, terwyl Clicks, Truworths, Mr Price en die Pepkor-groep van die ander huurders is. Die sentrum het twee deurryrestaurante, ’n voedselhof en meer as duisend parkeerplekke. “Die bouwerk aan die winkelsentrum is klaar,” sê Pretorius. “Ons is baie opgewonde om hierdie belangrike mylpaal te bereik.”

Peter Teixeira, burgemeester van Midvaal, sê die winkelsentrum is een van hul topprioriteite om beleggings te lok en die plaaslike ekonomie te laat groei.

OFM Nuus/Zenande Mpame cg