Central SA
Drie kinders sterf in ongeluk buite Bloemfontein─── 15:56 Fri, 24 Jan 2025
’n Derde kind het beswyk ná ’n noodlottige ongeluk op die N8 buite Bloemfontein.
Vrystaatse polisie ondersoek ’n saak van strafbare manslag ná die ongeluk aan die oostekant van die stad waarin twee kinders ook op slag dood is.
Die ma en nog twee kinders, asook die bakkiebestuurder, is hospitaal toe geneem, waar die derde kind later gesterf het. Foto: Facebook/Ntando Mkhuzangwe
Navalsig-polisie het Vrydag omstreeks 07:40 op ’n oproep gereageer oor ’n ongeluk oorkant die Superspar waarin ’n Chevrolet Spark en ’n Toyota Hilux betrokke was, sê sers. Mahomela Kareli.
’n Vrou en vier kinders was in die Spark onderweg. Die bestuurder van die bakkie was alleen in die voertuig toe die ongeluk gebeur het waarin twee kinders, ’n seuntjie (6) en ’n meisie (11), hul lewe verloor het, sê Kareli.
Beamptes het met die ma en nog twee kinders, asook die bakkiebestuurder, hospitaal toe gejaag, waar die derde kind later gesterf het.
Kareli het laat Vrydagmiddag gesê geen van die slagoffers kan nog uitgeken word nie. Hulle ondersoek ’n saak van strafbare manslag.
