Die beskuldigde (20), wat Dinsdag (26/11) aangekeer is, sal na verwagting Donderdag (28/11) in die hof verskyn nadat hy glo met derduisende rande se dwelms betrap is, sê ao. Omphile Masegela, provinsiale polisiewoordvoerder.

“Die polisie het ’n wenk opgevolg oor ’n verdagte wat na bewering besig was om dwelms by ’n huis in Keimoes af te laai. Nadat beamptes op die verdagte se huis toegeslaan het, het hy probeer om van die dwelms ontslae te raak en te vlug.”

Hulle het die verdagte aangekeer en beslag gelê op R6 000 se Mandrax-tablette. Hy staan tereg op aanklagte van dwelmhandel, sê Masegela.

Dwelms is gekonfiskeer, onder meer Mandrax-tablette. Foto verskaf

Intussen bly ’n man van Potchefstroom in aanhouding nadat hy na bewering met miljoene rande se dagga betrap is.

Michael Cilliers (29) het Dinsdag 19 November in die Potchefstroomse landdroshof verskyn waar hy van die onwettige besit van ’n vuurwapen en plofstof, asook die onwettige kweek en handel in dagga aangekla is, het Amanda Funani, polisiewoordvoerder, vroeër aan OFM Nuus gesê.

“ ’n Lasbrief is Donderdag 14 November deur die dwelmtaakspan, veiligheidsmaatskappy BIU en die provinsiale georganiseerde misdaadeenheid uitgevoer as deel van pogings om dwelmhandel en die verspreiding van onwettige vuurwapens te bekamp.”

OFM Nuus cg