Beamptes het Maandag beslag gelê op die batterye ter waarde van meer as R15 000. Die batterye is in bokse en in ’n rugsak gedra toe die polisie hulle in die middedorp vastrek, sê Sergio Kock, Noord-Kaapse polisiewoordvoerder. Hy voeg by die polisiediens se veldtog vir ’n veiliger feesseisoen is reeds in volle gang.

Terwyl die polisiebeamptes Prieska se middedorp gepatrolleer het, het hulle drie verdagte mans gesien wat bokse en ’n rugsak dra.

“Die polisie het die verdagtes gestop en deursoek, en dertig (30) Telkom-batterye gevind, wat vermoedelik by ’n nabygeleë Telkom-gebou gesteel is. Die mans is daar en dan in hegtenis geneem.”

Beamptes het Maandag beslag gelê op die batterye ter waarde van meer as R15 000. Foto verskaf

Volgens Kock gaan polisie werksaamhede verskerp en word meer veiligheidspersoneel beskikbaar stel gedurende die feestyd en daarna. So wil hulle almal se veiligheid verseker.

TimesLive het in Junie 2024 berig die Bloemfonteinse streekhof het ’n man tot 30 jaar tronkstraf gevonnis  wat Telkom-selfoontoringsbatterye ter waarde van R36 000 gesteel het.

Petro van den Berg, staatsaanklaer, het gesê die maksimum straf moet aan die oortreder Tinos Ndebele opgelê word, aangesien oortredings van inmenging met noodsaaklike infrastruktuur aan die toeneem is en dit die ekonomie benadeel.

“Die beskuldigde is tot 20 jaar tronkstraf gevonnis op ’n aanklag van inmenging met infrastruktuur en 15 jaar tronkstraf op ’n aanklag van diefstal van infrastruktuur.”

OFM Nuus cg