’n Man van Clocolan sal na verwagting op 11 Junie in die landdroshof verskyn nadat hy nie ’n leningsooreenkoms met ’n landbou-onderneming nagekom het nie.

Die Valke, verbonde aan Bethlehem se ondersoekeenheid vir ernstige handelsmisdaad, het Maandag (20/5) ’n dagvaarding aan die man (50) beteken. “Die verdagte moet op aanklag van bedrog en oortreding van die Kredietwet in die hof verskyn, sê Zweli Mohobeleli, Vrystaatse polisiewoordvoerder.

Na bewering het die man ’n lening van R800 000 by ’n Vrystaatse landbouonderneming. Die lening is goedgekeur op voorwaarde dat hy twee van sy voertuie as borg beskikbaar stel.

‘Die voertuie is reeds verkoop’

“Hy het nie sy maandelikse betalings nagekom soos ooreengekom nie. Toe die maatskappy die voertuie soek met die doel om dit te verkoop, is hulle in kennis gestel dat die voertuie reeds verkoop is, maar die lening is nie vereffen nie,” sê Mohobeleli. Die saak is aanvanklik teruggetrek, maar later weer op die hofrol geplaas.

OFM Nuus het die firma genader om kommentaar, maar hy wou nie uitwei oor die saak nie.

OFM Nuus dg/mc