Central SA
Noord-Kaap is gereed vir verkiesing van skoolbeheerliggame─── ZENANDE MPAME 10:45 Thu, 29 Feb 2024
![Noord-Kaap is gereed vir verkiesing van skoolbeheerliggame Noord-Kaap is gereed vir verkiesing van skoolbeheerliggame | News Article](https://oscar.ofm.co.za/img/0e4c1f13-489e-4035-940f-f2ed2353ee90.jpg?crop=0,132,600,470)
“Bevordering van onderrig en leer deur samewerking en goeie regering”.
Altesaam 554 openbare skole in die Noord-Kaap gaan deelneem aan die 2024 SBL-verkiesing wat van Vrydag (1/3) tot Sondag (31/3) duur. Elke drie jaar word die lede van die SBL verkies.
Die SBL-verkiesing se tema is: “Bevordering van onderrig en leer deur samewerking en goeie regering”.
Die vorige verkiesing was in 2021 en die huidige lede se ampstermyn is byna verstreke. “Die departement wil graag al die uittredende skoolbeheerliggaamlede bedank vir hul onbaatsugtige toewyding en uitstekende werk en hul bydrae tot die bestuur van skole in ons provinsie,” sê Geoffrey van der Merwe, woordvoerder van die Noord-Kaapse Departement van Onderwys.
Die rol van ’n SBL-lid is om die beste belange van die skool te bevorder. Foto: Noord-Kaapse Departement van Onderwys/Facebook
“In die meeste gevalle het jy jou burgerlike plig met geloofwaardigheid nagekom en daarvoor is ons dankbaar en jy het ’n gevoel van patriotisme getoon deur te aanvaar om as vrywilliger te werk ter ondersteuning van gehalteonderwys.”
Die rol van ’n SBL word in art. 20 subartikel (1) paragraaf (a) van die Suid-Afrikaanse Skolewet 84 van 1996 uiteengesit, dit is om: “Die beste belang van die skool te bevorder en daarna te streef om die ontwikkeling daarvan te verseker deur die verskaffing van gehalteonderwys vir alle leerders by die skool”.
Verkiesingsbeamptes op provinsiale, distriks- en skoolvlak het reeds hul opleiding ontvang. Die departement het stelsels om te verseker die 2024-verkiesing verloop goed en die beginsels van demokrasie word nagekom.
‘Ouers moet hul identiteitsdokumente onthou’
“Die departement sal werksessies vir alle nuutverkose beheerliggame reël sodat hulle vertroud kan raak met hul rol en verantwoordelikhede,” sê Van der Merwe. “Ons doen ’n beroep op alle lede van die samelewing om hulself beskikbaar te stel vir benoeming, vergaderings by te woon en aan die SBL-verkiesing deel te neem.”
Die skool se toelatingsregister sal as die kieserslys vir die skool dien, daarom word ouers gevra om seker te maak hul inligting is daarop. Hulle moet ook hul identiteitsdokumente wys op die dag van die verkiesing.