Die saak van bedrog en oortreding van die Wet op Openbare Finansiële Bestuur teen ’n voormalige departementshoof van Noordwes, wat ook met die Gupta-familie en sy medebeskuldigdes verbind word, is vir konsultasies uitgestel.

Dr. Andrew Lekalakala (58), voormalige departementshoof van gesondheid, en sy medebeskuldigde, Joseph Leshabane (61), het Dinsdag (31/1) weer in die hof verskyn toe hul saak tot 8 Maart uitgestel is.

Die staat sal na verwagting teen 9 Februarie die nodige dokumente aan verdedigingsadvokate verskaf vir konsultasies, sê Henry Mamothame, provinsiale NVG-woordvoerder. Lekalakala staan tereg op twee aanklagte van oortreding van die Wet op Openbare Finansiële Bestuur en twee van bedrog. Hy is borgtog van R10 000 toegestaan.

Former HOD for Health in the North West is arrested by the Hawks for the second time for fraud#sabcnews pic.twitter.com/70eflFEFsx

— oupa maine (@OupaMaine) December 6, 2019

Leshabane en sy maatskappy, Raliform Investment, word aangekla weens ses aanklagte van bedrog ten bedrae van meer as R49 miljoen. Sy borgtog beloop R50 000.

Hulle is albei op Maandag 2 Oktober 2023 deur die Valke se ondersoekeenheid vir ernstige korrupsie en handelsmisdaad in hegtenis geneem. Hulle word verbind met die saak van Lydia Keneilwe Sebego (63), voormalige departementshoof by Noordwes se departement van gesondheid, Vuyo Mbulawa (54), hoofdirekteur van dieselfde departement, en Roulgh Lotwane Mabe (69), ’n diensverskaffer, wat op Vrydag 29 September voor die hof verskyn het.

Lekalakala het na bewering op bedrieglike wyse ’n kontrak toegeken aan Mediosa Health, ’n maatskappy wat met die Gupta-familie verbind word, vir die verkryging van mobiele klinieke. Foto: X

Mamothame sê Sebego is borgtog van R10 000, Mbulawa R20 000 en Mabe R100 000 toegestaan. Die saak is saamgevoeg en al die beskuldigdes, insluitend twee voormalige departementshoofde, sal op dieselfde datum verskyn.

“Sebego staan tereg op twee aanklagte van die oortreding van die Wet op Openbare Finansiële Bestuur (PFMA), Mbulawa staan tereg op tien aanklagte van bedrog, en Mabe word van ses aanklagte van bedrog aangekla. Van 2008 tot 2009 het Noordwes gepoog om twee hospitale in Ledig (die Moses Kotane-hospitaal) en Vryburg (die Joe Morolong-hospitaal) te bou. ’n Tender is daarna aan MR Property (Pty) Ltd, ’n maatskappy wat aan Mabe behoort, toegeken,” sê hy.

Die aanklagte hou verband met diensvlakooreenkomste wat tussen die twee maatskappye en hul direkteure onderteken is oor dienste wat aan die twee hospitale gelewer moes geword het. Die dienste is egter nie gelewer nie en die maatskappye het glo bedrieglike fakture ingedien, wat deur die departement betaal is nadat dit deur Mbulawa gemagtig is.

Dit het na bewering gelei tot ’n verlies van meer as R86 miljoen vir die departement van gesondheid, terwyl die geld aan Mabe se maatskappy betaal is, en meer as R49 miljoen aan Leshabane se maatskappy betaal is.

“Die staat se bewyse onthul voorts dat die twee departementshoofde die diensvlakooreenkomste onderteken het, terwyl hulle geweet het dat die twee maatskappye nie aan die vereistes voldoen het nie,” sê Mamothame.

Intussen het Lekalakala ’n afsonderlike hangende saak, waar hy aangekla word van twee aanklagte van bedrog en een van die oortreding van dieselfde wet. Hy het na bewering op bedrieglike wyse ’n kontrak toegeken aan Mediosa Health, ’n maatskappy wat met die Gupta-familie verbind word, vir die verkryging van mobiele klinieke. In dié saak is hy uit op borgtog van R5000, en hy word weer op 12 Februarie in die hof verwag sodat die verhoor voortgesit kan word.

OFM Nuus/Kekeletso Mosebetsi cg/