Skuins langs die Gereformeerde Kerk Potchefstroom, op dieselfde terrein, staan ’n wit geboutjie met ‘n geskiedenis wat ver terugstap. Op 17 April 1863 vind die eerste kerkraadsvergadering van die nuut gestigte gemeente Potchefstroom in hierdie einste kerkie plaas. Daar word nou ’n geldinsameling gehou om die historiese juweel te restoureer en beter in te rig.

Dr. Wymie du Plessis, lidmaat van die gemeente en organiseerder van die projek, sê die plan is om die kerkie ná al die jare weer te gebruik vir aanddienste, klein troues en kunsuitstallings. Die restourasie behels selfs die installering van kerkbanke, wat dateer uit die 19de eeu. Herstelwerk aan die dak sal egter voorkeur moet geniet voordat dié drome bewaarheid kan word. 

Al is die oorspronklike kansel en banke verwyder, brand daar steeds ’n lig. Foto verskaf

Die kerk, wat deur die Gereformeerde Kerke in Suid-Afrika se eerste predikant, ds. Dirk Postma (1818–1890), ontwerp is en die boukoste £371 beloop het, het spoedig te klein geraak vir die groeiende gemeente. 

’n Nuwe kerkgebou is in 1897 in gebruik geneem. In 1960, kort ná die ingebruikneming van die huidige kerkgebou, is die vorige kerkgebou gesloop. Die eerste kerkie, hoewel nie meer in gebruik nie, het egter sy staanplek op die kerkterrein behou.

Orrelklanke vul reeds sedert 1863 dié klein aanbiddingsplek. Foto verskaf

Op 23 Desember bied die Gereformeerde Kerk Potchefstroom ’n musiekprogram, ’n Musikale Kersfees, aan wat gelei sal word deur die gemeenteorreliste, Magda Pelser-van der Merwe. Tydens hierdie feesgeleentheid sal donasies, wat gebruik gaan word vir die restourasie van die kerkie, verwelkom word. 

Du Plessis spreek ook haar dank uit teenoor ’n burgerregteorganisasie wat onlangs ’n ruim bydrae vir herstelwerk geskenk het.

’n Musikale Kersfees sal gelei word deur die gemeenteorreliste, Magda Pelser-van der Merwe. Foto verskaf

Die gemeente, wat uit 270 lidmate bestaan en vir wie hierdie restourasieprojek na aan die hart lê, sien uit na die dag wanneer woord en lied weer soos van ouds sal opklink in die eertydse aanbiddingsplek. Du Plessis sê daar heers ná al die jare steeds ’n ouwêreldse en gewyde atmosfeer in die klein gebou.

OFM Nuus/Elsabé de Jager  dg/mc