On Now
Weekdays 06:00 - 09:00
The Good Morning Breakfast Shandor, Margaret and John
NEXT: 09:00 - 12:00 Mid-Morning Magic with Yolanda
Listen Live Streams

Arts

Hannalie Taute solo-uitstalling: ’n Hergeboorte van nostalgie

───   KAYLA BARKER 09:00 Thu, 03 Apr 2025

Hannalie Taute solo-uitstalling: ’n Hergeboorte van nostalgie | News Article
Die uitstalling is in Oliewenhuis te sien. Foto verskaf

Oliewenhuis Kunsmuseum in Bloemfontein bied met trots “Euphoria … in sy Gloria …” aan, Hannalie Taute se 21ste solo-uitstalling. Sy sluit by Yolanda Maartens in die OFM Kunsteklop aan om oor die uitstalling en haar denkproses te gesels.

Die 19 multi-media kunswerke beeld Hannalie Taute se herstiksel van historiese narratiewe uit tot ’n fantastiese nuwe hergeboorte van die sprokiestrouemitologie. Die uitstalling is ’n viering van tye wat kom en het ten doel om ’n gevoel van vreugde te wek – iets waarna ons almal tans smag. 

Hannalie Taute vertel vir Yolanda Maartens meer oor die uitstalling en oor haar denkproses, sowel as haar inspirasie.

  

Hannalie verduidelik sy werk hoofsaaklik met foto’s wat beelde vasvang. Wat sy dan verander, herbedink en herinterpreteer. Sy gebruik hoofsaaklik vintage foto’s afkomstig van vlooimarkte en selfs uit haar eie familie-argiewe, wat dan so gebruik word, of opgeblaas word tot ’n groter skaal. Hierdie weggooi-oorblyfsels van die verlede word herwerk met geborduurde rubberbinneband-insetsels. Haar werke is deurdrenk met idees van identiteit in terme van kultuur, erfenis en samelewing.

Catch of the Day - Hannalie Taute

Catch of the day. Foto: Hannalie Taute

Hannalie Taute se eerste solo-uitstalling, genaamd “Siembamba – let’s play pretend”, is in 2004 by die João Ferreira-galery in Kaapstad gehou, en sedertdien het sy aan meer as 50 uitstallings en kunsskoue plaaslik en internasionaal deelgeneem, insluitend Australië, Nederland, Tasmanië en die VSA.

The tailor in front of a tree. Foto: Hannalie Taute

Sy gebruik borduurwerk, en kombineer dit met herwinde rubberbinnebande. Hierdie elemente word gebruik om ou foto’s, weergegee deur nuwe tegnologie, te verbeter om ’n vars narratief te skep. Sy skep haar eie denkbeeldige sprokiesryk deur die gesigte en historiese identiteite van hierdie vintage foto’s te verwyder. Sy vervang dit met ’n verskeidenheid kulturele maskers wat met kleurvolle geborduurde blomme op rubber vasgestik is. Só ontstaan ’n nuwe fantasie.

Hierdie skep daardie “Euphoria” waarvan Hannalie gesels.

Die uitstalling, “Euphoria … in sy Gloria …” is geïnspireer deur die tragedie van “Fairy-tale Logic”. 

Die publiek word genooi om by Oliewenhuis Kunsmuseum aan te sluit vir die opening van “Euphoria … in sy Gloria …”. Die opening vind op Donderdag 27 Februarie 2025 om 18:00 in die Annex-galery by Oliewenhuis-kunsmuseum plaas. Almal is welkom en toegang is gratis. Verversings sal bedien word.

Die uitstalling is by Oliewenhuis Kunsmuseum se Annex te siene tot 13 April. Toegang is gratis. Vir meer inligting, skakel gerus 078 968 4300 of epos oliewen@nasmus.co.za 

OFM cg

@ 2025 OFM - All rights reserved Disclaimer | Privacy Policy | We Use Cookies - OFM is a division of Central Media Group (PTY) LTD.