Local News
Vaalrivierbesoedeling: Matlosana sal môre reageer─── DANE BEISHEIM 17:42 Tue, 10 Feb 2015
Klerksdorp - Die Matlosana-munisipaliteit in Noordwes wou nog nie kommentaar lewer op bewerings dat hulle besig is om die Vaalrivier te besoedel nie.
Skakelbeampte Isaac Diphoko het gesê dat dit 'n sensitiewe kwessie is en dat hulle tyd nodig het om hul terugvoer te formuleer.
Dit volg nadat die VF Plus se Michal Groenewald vroeër vandag 'n verklaring uitgereik het waarin hy beweer dat die Stilfontein-rioolstelsel weinig of glad nie werk nie, en onverwerkte riool in die Koekemoerspruit inspoel wat direk in die Vaalrivier vloei.
Hy het gesê die party gaan 'n klagte by die groen skerpioene lê.
Diphoko sê die munisipaliteit, wat in Klerksdorp gesetel is, sal môre reageer.
Dane Beisheim/OFM-nuus
