Die gesondheidsdepartement het Woensdag gesê die omkeertyd vir die verwerking van toetsuitslae by die Nasionale Gesondheidslaboratoriumdienste word vertraag weens ’n kuberaanval op 22 Junie vanjaar.

Woordvoerder Mzi Gcukumana sê hulle werk daaraan om die sekuriteitsbreuk by die Nasionale Gesondheidslaboratorium (NHLS) so spoedig moontlik op te los.

“Die laboratorium het ’n kritieke toetslys aan alle gesondheidsgeriewe ontwikkel en versprei. Dit word gedoen om die volume toetsversoeke te beperk sodat ons laboratoriums die werkslading kan hanteer. Roetinetoetse sal wel nog uitgevoer word.

South Africa’s National Health Laboratory Service (#NHLS) is battling the aftermath of a #ransomware attack that hit on June 22, disrupting systems and deleting backups. This has led to significant delays in lab testing and blocked #online access to test results. #healthcare

— Group-IB Global (@GroupIB) July 4, 2024

“Ons het met innoverende maniere vorendag gekom om toetsuitslae van historiese TB- en MIV-tellings aan dokters beskikbaar te stel. Meer toetse, met die prioriteit van dié op die kritieke toetslys, sal beskikbaar gestel word. Ons is ook in die proses om met ’n elektroniese registrasiestelsel nuwe monsters te registreer en toetsresultate elektronies te verskaf.”

Die NHLS se uitvoerende hoof, prof. Koleka Mlisana, het gesê aan die diensleweringskant (toetsing) funksioneer alle laboratoriums, hoewel die verskaffing van toetsresultate aan dokters ’n uitdaging bly.

“Onder normale omstandighede word die laboratoriumverslae outomaties gegenereer en aan dokters op WebView beskikbaar gestel, hierdie voorval het daardie funksionaliteit gedeaktiveer. Alle dringende resultate word egter telefonies aan versoekende dokters gekommunikeer,” het Mlisana gesê.

Now why the yell would you hack NHLS???? Why can’t you guys hack banks and cancel our debts like real villains??? https://t.co/mbD28n6g0N

— Ntomb’enhle ?? (@SunshineMkhize) June 24, 2024

Die woordvoerder van die departement van gesondheid, Foster Mohale, sê die kuberaanval het ’n outomatiese funksie vir die stuur van laboratoriumresultate gedeaktiveer. Mohale sê alles word nou met die hand gedoen. “Waar dit tien minute geneem het vir die dokter om ’n pasiënt te diagnoseer, neem dit tot 20 minute weens die stelsel wat ons nou moet gebruik.”

“Dit is ’n krisis waaraan tans aandag gegee word met die dringendheid wat dit verdien.” Hy sê dit het die omkeertyd beïnvloed.

’n Saak is by die polisie geopen.

OFM Nuus cg