Annemarie van Heerden was die oudste persoon op ’n gradeplegtigheid wat verlede week in die nuwe Tsebonokengsaal op die universiteit se Vanderbijlparkkampus gehou is.

Luidens ’n verklaring deur die universiteit, kom haar prestasie 42 jaar nadat sy in 1980 'n honneursgraad in musiek aan die Universiteit Stellenbosch verwerf het. Dié besige ma van ses, ouma van vier, Labrador-teler en deeltydse musiekonderwyser, het haar kinders geskok toe sy hulle vertel sy gaan terug universiteit toe om 'n honneursgraad in sielkunde te voltooi.

"Hulle het vir die idee gelag. Almal het gedink ek is mal. Hulle het my probeer ontmoedig, maar dit het nie gewerk nie. Ek wou my kleinkinders inspireer wat my gedruk en aangemoedig het om my passie te volg.”

Sy sê sy het besluit om sielkunde te studeer omdat sy daarvan hou om met kinders en mense te werk.

“Ek is 'n ywerige leser van sielkundeliteratuur. My belangstelling in mense en kinders, spesifiek in terapeutiese werk en om te verstaan hoe mense funksioneer, het my geïnspireer om sielkunde te studeer. As musiekonderwyser het ek gevind dat ek met jongmense op 'n dieper vlak 'n band kon vorm. Ek wou hul gedrag en emosies beter verstaan. Sielkunde het vir my gelyk na die ideale rigting om te verken en meer te leer oor hoe om kinders sinvol te help," sê Van Heerden.

Sy sê om haar droom te verwesenlik was 'n uitdaging.

"Ek moes klasse bywoon saam met studente wat baie jonger as ek is. Dit was van die nederigste oomblikke in hierdie reis, maar ek is dankbaar dat my klasmaats en dosente my aanvaar en ondersteun het.”

Nog ’n uitdaging was eksamens van drie uur lank. 

"Ek kon sommige van my eksamenvraestelle nie betyds voltooi nie. As ek kon, sou ek my graad cum laude behaal het."

Haar boodskap aan ander is om nooit bang te wees om daardie eerste tree te gee nie.

"Of jy nou 'n nuwe werk begin, 'n passie najaag of bloot iets nuuts probeer, die sleutel is om dapper te wees en daardie aanvanklike geloofsprong te neem. Neem daardie eerste tree en kyk waar dit jou neem."

Haar man, dr. Johannes van Heerden, 'n steenkoolwetenskaplike en 'n NWU-alumnus, het haar na die gradeplegtigheid vergesel.

"Sy het so hard gewerk, en om te sien hoe sy hierdie mylpaal bereik is wonderlik. Dit is ’n bewys van haar toewyding en deursettingsvermoë en ’n herinnering dat enigiets moontlik is as jy jou gedagtes daarop instel. Ek is seker haar storie sal baie ander inspireer om hul drome na te streef, ongeag hul ouderdom,” sê hy.

OFM Nuus