Central SA
Prokureur in hof oor dwelms─── 08:48 Sun, 10 Jan 2021
'n Noord-Kaapse prokureur en haar medepligtige sal na verwagting weer op 2 Maart in die Keimoes-landdroshof verskyn op aanklagte van dwelmhandel.
Dit kom nadat die 32-jarige Sue-Ann Koopman en haar vermeende medepligtige, die 35-jarige Richard John vroeër op R300 elk borgtog vrygelaat is.
Hulle is deur die Valke se eenheid vir ernstige georganiseerde misdaad, vergesel deur die grenspolisie en honde-eenheid, in hegtenis geneem.
Volgens die Valke se provinsiale woordvoerder, Nomthandazo Mnisi, het die spanne die verdagtes se huis deursoek en op Mandrax-tablette ter waarde van R1 550 afgekom, asook dagga ter waarde van R2 650.
Ondersoeke duur voort.
OFM-nuus/Roderick Titus
