VolgensAMT-ontleder, Dr. Johnny van der Merwe, is pryse vir witmielies en anderkommoditeite steeds onder druk weens binnelandse voorraadvlakke eninternasionale faktore.

Graanpryse:

Witmielies se spotprys het aanvanklik skerp gestyg, maar weer effens teruggesak op Dinsdag. Dit verhandel tans teen R6 250 per t. Die Julie 2025-prys bly onder druk en staan op R4 090 per t. 

Geelmielies se spotprys het gedaal na R4 894 per t, terwyl die Julie 2025-prys op R4 004 per t staan.

Sojaboonpryse het ook gedaal, met die spotprys nou op R8 625 per t en die Mei 2025-prys laer op R7 585 per t. Sonneblom se spotprys het afgeneem tot R8 810 per t, met die Mei 2025-prys op R8 700 per t.

Koring se spotprys het gestyg na R6 174 per t, terwyl die Desember 2025-prys op R6 292 per t staan. Die invoerpariteitsprys vir koring in Durban is tans R5 189 per t. 

Uitgedopte Argentynse grondbone verhandel teen R20 879 per t.

Die nuutste katoenprys het ’n effense styging getoon en staan nou op R10 280 per t. Die laer binnelandse voorraad het tot positiewe marksentiment gelei, wat veral witmieliepryse opgedruk het. 

Daar word verwag dat pryse relatief stabiel sal bly tot in April, waarna ’n afwaartse neiging moontlik sal volg met die aanvang van die oesproses.

Internasionaal speel weerstoestande, aanplantingsintensies in die VSA en China se invoertariewe ’n rol in prysbewegings. Die verwagting is dat mielie-aanplantings in die VSA met 4% gaan toeneem, terwyl sojaboon-aanplantings met 4% kan daal. 

Indien daar plantvertragings in die VSA voorkom, kan dit die verwagtinge beïnvloed en pryse verder laat beweeg.

Vleispryse:

Die nasionale gemiddelde speenkalfprys het gestyg na R34,38 per kg. Direkte verkope het toegeneem na R35,10 per kg. 

Ligter speenkalwers verhandel tans teen R34,19 per kg, terwyl swaarder kalwers effens gedaal het na R32,40 per kg.

Slagpryse het ook stygings getoon. Die A2/3-karkasprys staan nou op R55,60 per kg, met die C-graadprys hoër op R47,11 per kg. 

Die koeiprys is tans R11 969 per kop, terwyl dragtige koeie gemiddeld teen R15 360 per kop verhandel.

In die lams- en skaapmark het die gemiddelde stoorlamprys gedaal na R40,64 per kg, maar slaglampryse het skerp gestyg na R43,89 per kg. Direkte slaglampryse het gestyg tot R44,40 per kg. 

Pryse bly steeds sowat 10% hoër as verlede jaar, maar onder die 2022-vlakke.

Wol- en ander markte:

Daar was goeie nuus vir wolprodusente, met RWS-skoonwolpryse wat met 4% gestyg het tot R186,35 per kg. Nie-RWS wolpryse het ook gestyg tot R182,02 per kg. 

In Australië het wolpryse met 1% gestyg na ’n gemiddelde van 12,42 Australiese dollar per kg.

Die hoendermark het stabiel gebly met gevriesde hoenderpryse op R33,19 per kg en vars hoenderpryse op R36,78 per kg. EQF-pryse is tans R33,29 per kg.

Varkpryse bly op hul huidige vlakke, met spekvarkpryse op R32,43 per kg en vleisvarkpryse op R32,70 per kg. Die verwagting is dat pryse moontlik sywaarts kan beweeg tot Julie. 

Voermark: 

Lusernpryse is in ’n opwaartse tendens soos die winter nader kom. Graad 1-lusern verhandel teen R3 200 per t, terwyl prima lusern R3 800 per t bereik het. Sojameel se invoerpariteitsprys is hoër op R11 258 per t. Die vraag na voer is besig om toe te neem, veral weens verhoogde speentydperke.

OFM Agri mvh